PRC Andam Moimbistigar sa Nurse

●PRC Hearing Officer miingon nga magpaabot sila sa pormal nga reklamo sa ginikanan aron makasugod sa imbestigasyon.

Ang kadagkoan sa Professional Regulations Commission (PRC) andam moimbestigar niadtong nurse nga mipatapot og plaster sa baba sa bata sa tumong nga dili na siya makahilak.

Apan ang hearing officer sa PRC nga si Atty. Roselyn Soria miingon nga magpaabot ra sila kun ang mga ginikanan sa bata mopadangat og pormal nga reklamo aron makasugod sila sa imbestigasyon.

Ang Commission on Human Rights (CHR) andam usab mo- imbestigar sa gihimo sa usa ka nurse sa maternity house diha sa Osmeña Boulevard.

Gitataw na sa kadagkoan sa Department of Health (DOH) nga ang paggamit og plaster aron lang dili makahilak ang bata dili tukma nga paagi ug wala kini itugot.

Ang problema hinuon mao nga kinahanglan nga ilhon gayud kun kinsa ang nurse nga naghimo pagpapilit og plaster sa baba sa bata.

Matud ni Soria nga kun makahatag na og ngalan ang mga ginikanan sa bata, ang PRC mosuta dayon kon ang mao nga nurse aduna ba’y lisensya sa iyang trabaho.

Samtang ang kadagkoan sa Department of Social Welfare and Development (DSWD) mibana-bana na kun unsa ang ilang ikatabang sa bata. Hinuon, giasoy sa mga opisyal sa DSWD nga kun ang basehan mao ang hulagway sa bata nga adunay plaster ang baba, ang nagbuhat niini nakahimo gayud og kalapasan.

Adunay nag-ingon nga hilak kayo ang mao nga bata ug nakatugaw sa pagkatulog sa uban nga mga bata sa maternity house. Giingon nga adunay mga 30 ka bata nga didto sa anakanan sa mao nga higayon.