News
Postal ID, Mahimo nang Gamiton sa Pagkuha og Passport
Gikumpirmar sa Department of Foreign Affairs (DFA) nga gidawat na sa tanan nilang mga opisinang konsular ang Improved Postal ID isip usa sa mga nag-unang dokumento sa pag-ila alang sa mga gustong mokuha og pasaporte.
Gipahayag sa DFA ang kumpirmasyon sa pagdawat sa Postal ID isip nag-unang ID gikan sa usa ka sulat ni DFA Undersecretary for Civilian Security and Consular Concerns Ariel Abadilla kang Assistant Postmaster General Luis Carlos isip nag-unang ID sa ilhanang pisikal ug biometrics nga nagpalambo sa lebel sa seguridad niini.
Gidugang pa ni Abadilla nga maapil na ang Improved Postal ID sa bag-ong bersyon sa ePassport Application Form nga ipagawas sa DFA sa mga mosunod nga semana. Tungod kay ang Improved Postal ID ang pinadaling makuha nga valid ID gikan sa gobyerno, mas mapadali na alang sa mga ordinaryong katawhan ang pagkuha og passport.
Kauban sa Postal ID, kinahanglan na lamang isumite sa DFA sa mga gustong mo-apply niini ang ilang birth certificate ug application form nga adunay kumpletong detalye. Ang Improved Postal ID gidawat usab isip valid ID sa tanang institusyong pinansyal nga gidumala sa Bangko Sentral ng Pilipinas (BSP) sa tibuok nasod. Ang mga Pilipino ug langyaw nga namuyo sa nasod bisan unsa ang pangedaron o propesyon, mahimong mo-apply alang sa Improved Postal ID.
Kinahanglan lamang og duha (2) ka kopya sa application form nga adunay kumpletong detalye, pagmatuod sa pagkatawo ug gipuy-an. Ang application fee nagkantidad og P504.00, apil na ang tax ug delivery fee niini. (ecb/PIA7-Bohol)
