Pokemon Go, Ibawal Na Sa Mga Buhatan Sa Gobyerno

Hingpit nang ibawal ang pagduwa sa nisikat na karong reality based game application nga Pokemon Go sa tanang mga buhatan sa gobyerno.

Matud pa sa Civil Service Commission (CSC), wala gitugotan ang pagduwa og Pokemo Go sa oras sa trabaho ang mga kawani sa gobyerno aron dili maapektuhan ang pagserbisyo sa publiko.

Plano usab sa CSC nga padalhan og sulat ang developer sa maong game application nga tangtangon ang mga pokestops ug pokemon gym sa tanang mga buhatan sa gobyerno.

Ang Pokémon Go usa  ka location-based augmented reality mobile game nga hinimo sa Niantec alang sa mga Android ug iOS devices.

Mogana kini pinaagi sa GPS nga maoy mo-detect kun asa ang nagduwa ug ang internet connection.

Ang mga pokestops mao ang mga lugar sa Pokemo Go nga mahimong makakuha og mga items sama sa Pokéballs, Lure, Incense, Revive, Potions ug Pokèmon Eggs.

Ang mga pokestops may koneksyon usab sa atong tinuod nga mga lugar sama sa usa  ka makasaysayanong lugar o monumento sa nagkalain-laing lugar. (ecb/PIA7-Bohol)