POEA: Mga OFW Gidid-an Pagtrabaho sa Venezuela

Gipatuman sa Philippine Overseas Employment Administration (POEA) ang temporaryo nga pagsuspenso sa pagpadala og mga overseas Filipino workers (OFW) nga gustong mo-trabaho sa Venezuela.

Kini tungod kay gi-isa sa Department of Foreign Affairs (DFA) ang crisis alert level 2 o restriction phase sa nasud gumikan sa mga demonstrasyon nga misulbong didto sa tuyo nga pagpalagpot sa pwesto sa ilang presidente nga si Nicolas Maduro.

Matud pa ni Department of Labor and Employment (DOLE) Secretary ug POEA governing board chairman Rosalinda Baldoz, nga gi-aprobahan na ang kasamtangang pagpahunong sa pagpadala og OFWs sa nasud sa Venezuela tungod sa nagka-grabeng kagubot didto.

Gipirmahan ang maong resolusyon nila ni POEA Administrator ug vice-chair Hans Leo Cacdac ug sa mga miyembro sa board nga sila si Feliz Oca, Estrelita Hizon ug Alexander Asuncion.

Samtang gipalikay sa DFA ang mga Filipino sa Venezuela sa daghang mga tawo o kritikal nga lugar diin gipahigayon ang mga rally.

Gipaandam na usab ang mga OFW didto sa posibleng evacuation.