PNoy Gisubhan Ang Unang Bronzeoak Solar Power Plant sa Negros Occidental

● SACASOL ang unang proyekto sa enerhiya sa Visayas nga migamit sa modernong kahimanan nga mao ang ‘solar energy’.

Negros Occidental–Duha ka mga lugar dinhi sa Negros Occidental nga may dagko nga mga proyekto ang giduaw ni Pamunong Nasud Benigno Aquino adlawng Huwebes sa buntag.

Sa alas 10:00 sa buntag gisubhan sa pamunong nasud ang 22- Megawatt (MW) solar energy sa San Carlos City nga gitawag og San Carlos Solar Energy, Inc.(SACASOL) nga nahimutang San Carlos Ecozone, syudad sa San Carlos. Ang phase 1, nga una sa duha ka solar project nga gisubhan ni Aquino, adunay gikusgon nga 13MW.

Ang ikaduha bahin sa proyekto o Phase 1B, adunay 9MW nga pasilidad nga gipaabot nga mohatag og ’35-million kilowatt hour’ sa enerhiya dinhi sa Visayas grid ug maka supply ug igong gikinahanglanon’ng kuryente sa Negros Occidental, Negros Oriental, Cebu ug Iloilo.

Ang maong proyekto nagkantidad og $45 million uban sa abag-pinancial sa ThomasLloyd, usa ka pangkalibutanon’ng investment management group ug Bronzeoak Philippines Inc., usa ka companya nga espesialista sa renewable energy.

Sa pagka-alas 11:00 sa buntag gisubhan usab ni Aquino ang bag-ong Himoga-an Bridge, ug ang 3,416 kilometro nga access road, didto sa Barangay Paraiso, Sagay City sa Bacolod.

SACASOL

Sa iyang pag-abot sa planta sa SACASOL, gipangunahan sa pamunong nasud ang seremonyas sa pag-switch-on sa planta sa solar energy uban nila ni Department of Energy (DOE) Secretary Petilla, ug mga lokal nga opisyal.

Sa iyang pagpamulong gipasalamatan sa presidente ang mga opisyal sa kagamhanan sa maong lalawigan ug dakbayan ug ang mga opisyal sa DOE tungod sa kalamousan sa mang proyekto.

Alang sa pamuno nasud, ang SACASOL maoy unang proyekto sa enerhiya dinhi sa Visayas nga migamit sa modernong kahimanan sa pagpasuga nga mao ang ‘solar energy’. Dako kaayo kini og ikadugang sa enerhiya nga gikinahanglan sa Visayas tungod kay mo-supply kini og kuryente sa Visayas grid.

Ang kuryente sa Visayas grid ikatag-katag na usab sa mga lungsod sa Negros Occidental, Negros Oriental, Cebu, Iloilo ug uban pang mga lugar nga wala pay kuryente.

Duha ka bahin ang SACASOL, diin ang ikaduha padayon pang gitrabaho nga nahimutang usab sa atbang ra nga nahimutangan sa Phase 1.

Wala pa hinuon ibutyag kun kanusa mahuman ang phase 1B nga SACASOL aron usab sa pagsubo niini.

HIMOGO-AN BRIDGE

Human sa pagsubo sa SACASOL, ang presidente miadto dayon sa Sagay sakay sa open type nga pick-up ug nanguna sa seremonyas sa paglabang sa bag-ong nahuman nga taytayan uban ni Department of Public Works and Highways (DPWH) Secretary Rogelio Singson ug mga lokal nga opisyal.

Human sa maong seremonyas, giablihan usab dayon ang marker sa maong taytayan.

Miingon ang pamuno nasud nga usa sa mga kalampusan sa DPWH ang maong mga proyekto nga gitumong alang sa mas gaan nga lihok sa katawhan sa maong lugar ilabi na sa mga kabus.