Pletehan sa PUJ Posibling Umentohan

● Si Cuizon miingon posibling tugotan ang gipangayo’ng P2.50 usbaw sa pletehan sa Cebu Integrated Transport Cooperative (CITRASCO).

Posibling umentohan usab ang pletehan dinhi sa Sugbo human aprobahe sa Land Transportation Franchising and Regulatory Board (LTFRB) ang fare increase nga gipetisyon sa mga transport sector didto sa rehiyon 3 ug 4.

Sumala pa ni LFRBR-7 Regional Director Ahmed Cuizon nga posibling tugotan sa ilang buhatan ang gipangayo nga P2.50 usbaw sa pletehan sa Cebu Integrated Transport Cooperative (CITRASCO). Apan iyang gitataw nga ang pagtugot og usbaw sa pletehan dinhi sa Sugbo mag-agad sa resulta sa ipahigayon nga public hearing sa LTFRB-7 aron masayran gikan sa nagkadaiyang sektor kinsay pabor ug supak sa petisyon sa CITRASCO.

Gipasabot ni Cuizon nga hangtud karon ang iyang buhatan nagpadayon pa pagtuon kun kanus-a ipahigayon ang naasoy nga public hearing alang sa usbaw sa pletehan sa mga PUJ dinhi sa Sugbo.