‘Piso para Hospital’ Ipadayun ni Rama

Si Mayor Michael Rama mimando nga ipadayon sa dakbayan sa Sugbo ang gilusad nga “Piso Mo, Ospital Ko” Fund Campaign nga pagpangayo og donasyon gikan sa publiko aron kini magamit pagpatukod og bag-ong ospital sa dakbayan.

Ang hukom ni Mayor Rama pagpadayon sa pagpangolekta og donasyon gikan sa publiko gibasi sa legal nga opinion ni City Legal Officer Jerome Castillo nga ang mga Local Government Units (LGU) dili na kinahanglan nga mangayo pa’g permit kon mangolekta og donasyon sa publiko alang sa “public purpose”.

Si Deputy Ombudsman for the Visayas Pelagio Apostol, sa sayo pa miawhag sa mga opisyal sa dakbayan sa Sugbo nga sundon ang balaud nga mangayo og permiso sa kadagkoan sa Department of Social Welfare and Development (DSWD) kon mangayo og donasyon gikan sa publiko.

Si Apostol nagkanayon nga kinahanglang tumanon usab sa mga opisyal sa dakbayan nga himoan gayud og mga resibo kon adunay mohatag og donasyon bisan og kantidad lang sa peso ang ihatag nga hinabang.

Matud ni Florito Carlo Dugaduga, public information officer sa dakbayan sa Sugbo, nga ang mga plastic gallon nga butangan sa mga donasyon gikan sa katawhan dad-on sa iyang opisina matag hapon ug iphon atubangan sa mga kawani sa City Treasurer’s Office.

Gipasabot ni Dugaduga nga resibohan gayud sa City Treasurer’s Office ang kantidad nga maihap nila gikan sa mga plastic gallon.

(Image Credit: newsinfo.inquirer.net)