Pinaskuhan sa Mayor

Si Mayor Michael Rama nakatigum og pwerteng daghana nga mga Christmas gifts nga iyang nadawat gikan sa iyang kahigalaan ug mga tag-iya og mga dagkung balay-patigayon.

Bisan paman og ang Sugbo ug ubang bahin sa Kabisay-an naigo sa katalagman, daghan gihapon nga mga tagdumala og mga balay-patigayon nga wala malimot paghatud og mga gasa ngadto sa mayor.

Apan ang mayor miingon nga ang mga gasa nga gipundok niya ilawom sa daku nga Christmas Tree sa hawanan sa iyang balay nga nahimutang sa Rama Compound sa Basak-San Nicolas iya ra usab nga gipanghatag sa mga miadto sa iyang balay og mi-greet kaniya atul sa pasko.

Kini usab maoy sagad himoon kaniadto ni kanhi mayor Tomas Osmeña nga ipanghatag ang mga gasa nga ilang madawat. Sila si Rama ug Osmeña managsama og baruganan nga mas nindot ang makapanghatag og pinaskohan atul sa pasko.

Matud ni Mayor Rama nga ang tanang miadto sa iyang panimalay sa miaging pasko pulos nakabitbit og pinaskohan nga naglakip sa mga daan niya nga mga sinena, karsones, amerikana, sapatos ug mga pagkaon nga wala na niya kinahanglana.

Si Osmeña usab miingon nga malipay usab siya nga makapanghatag mao nga kon adunay mga higala niya nga mamarayeg kaniya og pinaskohan dili niya balibaran.