Pilipinas, Ika-Unom sa Labing Malipayong Nasud, Matud sa Survey

Ika-unom ang Pilipinas sa labing malipayong nasud sa tibuok kalibotan sa tuig 2013.

Sa Positive Experience Index (PEI) survey nga gihimo sa US research group nga Gallup, sa 1,000 respondents gikan sa 138 ka nasud, migawas nga 7 sa matag 10 ka tawo sa kalibotan ang nakasinati og positibong emosyon sa dihang gipangutana kalabot sa nahimong adlaw nila.

80 porsyento gikan sa Pilipinas ang mitubag og positibo o malipayon sila sa maong adlaw.

Susama sa Pilipinas sa ika-6 nga pwesto ang Indonesia ug Thailand.

Sa ikatulong higayon, nanguna pa gihapon ang Paraguay, diin 87 porsyento sa respondents ang miingong positibo sila sa adlaw nga gihimo ang maong survey.

Misunod sa listahan ang Panama nga adunay 86%, samtang ikatulo ang Guatemala, Nicaragua ug Ecuador nga adunay 83%.

Nahimutang sa ika-upat nga pwesto ang Costa Rica, Colombia ug Denmark diin natala ang 82 porsyento sa mga mi-responde nga malipayon sila, ug ika-lima ang Honduras, Venezuela ug El Salvador nga adunay 81 porsyento.

Nag-una pa ang Pilipinas sa Canada ug Australia nga adunay tag 79 porsyento ang usa ug usa, ug ang Estados Unidos nga may 78% sa labing malipayong nasud.

Samtang natala usab ang labing ubos sa PEI survey ang Syria nga may 36 porsyento lamang.

Ikaduhang tuig na kini sa Syria nga anaa sa labing ubos nga may positibong emosyon sa kalibotan.

Image Credit: www.expatch.org