Permit Alang “Peso Mo, Ospital Ko”, Dili na Kinahanglan – DSWD

Ang kagamhanan sa dakbayan sa Sugbo mipadala na og suwat sa Ombudsman-Visayas nga nagtataw nga dili na magkinahanglan og permit ang City Hall sa paglusad niini sa “Peso Mo, Ospital Ko” fund campaign.

Si Vice Mayor Edgardo Labella maoy mipadala’g suwat kang Deputy Ombudsman for Visayas Pelagio Apostol nga nagpasabot sa mga punto nganong wala na kinahanglana pa sa dakbayan sa Sugbo ang pagpangayo’g permit alang sa paghimo og Fund Drive.

Ang Ombudsman mitataw nga nakahimo’g sayop ang dakbayan sa Sugbo tungod sa paglusad og “Peso Mo, Ospital Ko” fund campaign nga wala mokuha daan og permit gikan sa Department of Social Welfare and Development (DSWD).

Ang “Peso Mo, Ospital Ko” fund campaign gitumong aron nga ang dakbayan sa Sugbo makatigum og salapi nga ikadugang sa pagahimoon nga bag-ong ospital nga ipuli sa Cebu City Medical Center.

Si Labella miingon nga gitug-anan siya ni DSWD Assistant Director Nemia Antipala nga wala na kinahanglana pa sa dakbayan sa Sugbo ang permit kon mohimo’g fund drive.

Matud ni Antipala nga ang mayor gani maoy gihatagan og gahum ubos sa Local Government Code (LGC) nga maka-isyu og permit sa mohimo’g fund drive alang sa charitable purpose.

Si Labella midayeg hinoon sa gihimo sa Ombudsman nga pagpakabana aron nga ang mga opisyal sa dakbayan dili makahimo og kalapasan sa balaud.