PDEA Nagpatabang Batok sa Drugas sa Kabatan-onan

Nanawagan ang Philippine Drug Enforcement Agency (PDEA) Bohol sa mga ginikanan sa mga kabataan sa pagsubay sa ilang mga anak, dungan sa bag-ong kasayuran nga daghan kanila ang mihukoy og sulod sa bisyo sa drugas.

Sa pagpakighinabi, gi-awhag sa PDEA pinaahi ni Ferdinand Kintanar, PDEA Bohol chief nga tabangan unta sa tanan ang suliran sa drugas kay tataw nga dili kini maatol kon ang kapolisan, army, National Bureau of Investigation ug PDEA lang ang pasagdan.

Kini usab samtang kapin sa dos mil ka mga bata nga nag panuigon og ubos pa sa 18 anyos o ang age of maturity, ang naduhig sa ilegal nga drugas human sa operasyon sa kapulisan sa pagpatahan niini.

Didto sa Gender and Development Technical Working Group (TWG) nga tigum sa Reynas Garden, Disyembre 14, gitaho ni Provincial Social Welfare and Development Officer Carmelita Tecson, nga mikabat sa 7.5 porsyento sa 34,000 ka mga Bol-anong misurender human makampanya batok sa ilegal nga drugas.

Sa kampanya sa kapolisan sa Oplan Double Barrel, o mas nailhan sa Toktok-Hangyo (TokHang) sugod sa Hulyo ngadto sa Nobyembre 2016, kinatibuk-ang 2,540 ka menor de edad ang misurender uban sa mga hamtong. Kini tungod sa ilang pagkaduhig sa ilegal nga drugas, matud ni Tecson.

Sa mga mingsurrender, 2,491 niini ang mga lalaki sa bata pa nga panuigon ang miangkon nga migamit sa makahungog nga drugas. Didto gihapon sa tigum, nga gitambongan sa 20 ka mga sakop sa 24 ka miembre nga TWG, gidugang ni Tecson pagbutyag nga 13 ka batan-ong lalaki ang miangkon nga namaligya o drugas, ug laing 4 ang miangkong nagpalusot sa mga ilegal nga substances tabok sa mga boundaries aron itumod sa laing lugar.

Sa laing bahin, sa mga kababaihan, 31 kanila ang miangkon nga sila migamit sa ilegal nga drugas samtang labing menos usa kanila ang namaligya o nagnegosyo niini. Sa mga napadayag nga kamaturoan, daghan pa ang nagtuo nga mas dako pa niining mga nasaysay ang kinatibuk-ang hulagway sa mga menor de edad nga na-ungo sa ilegal nga drugas.

Gani, segun sa Philippine Drug Enforcement Agency (PDEA) Bohol, ila na nga gitutokan ang kampanya sa ilegal nga drugas ngadto sa mga tunghaan ilabi na sa syudad ug kalungsuran, dala sa pagtuo nga niay daghang kabataan ang nahaylo sa drugas sa aghat sa pagsuway-suway lamang.

Apan bisan pa, mipalubad gihapon si PDEA Bohol chief Ferdinand Kintanar nga kasagarang kabatan-onan nga nagagikan sa mga banay nga may lisud ang kahimtang ang nahitumpawak sa bisyo. Gawas nga kon ang banay anaa na sa duol sa pagkabungkag, wala nay kasultihan sa mga suliran ang bata, hinungdan nga sayon ra kini mahaylo sa bisyo, ilabi na sa drugas.

Dugang pa ni Kintanar, nga ang kasagarang mga anak sa mga banay nga may usa ka sakop nga tua nanarbaho sa gawas, may igo nga ikapalit alang sa drugas nga ikasuporta sa bisyo. Tungod niini, nanawagan na usab ang Bohol Council for the Protection of Children ngadto sa mga ginikanan sa pag-subay sa mga kabataan aron makalikay kini sa haylo nga makahungog nga bisyo nga maglumpag sa kaugmaon. (rac/PIA-7/Bohol)