PDEA: “Fly High” Kuyanap sa Central Visayas

●PDEA miingon nga kining matang sa gidiling druga mas labaw og epekto sa ‘Shabu’ tungod kay ang sagul niini mao ang Shabu, Viagra, Cialis ug Ecstacy.

Mikuyanap na usab karon dinhi sa Central Visayas ang laing makabuang nga matang sa druga nga mao ang “superman” o “fly-high” sumala ni Regional Director Esperidion Javier sa Phil. Drug Enforcement Agency (PDEA).

Matud pa ni Javier nga kining maong matang sa gidiling druga mas labaw og epekto sa shabu tungod kay ang mga engrediente niini mao ang shabu, viagra, cialis ug ecstacy, matud pa ni Javier.

Midugang siya nga ang viagra ug ecstacy maoy labing epektibo nga mopagahi sa kinatawo sa lalaki nga luya na samtang ang shabu maoy mohatag og puwersa sa tawo nga bisan walay kaon, molahutay og dugay nga dili maluya, sumala pa ni Javier.

Ang shabu dili usab makapaduka sa tawo kay libog ang iyang hunahuna apan mohatag og labing kaabtik sa panlihok-lihok ilabi na kun mahubog na sa shabu.

Busa miingon si Javier nga kining “fly high” labing makapamangtas sa tawo nga makatomar niini, apan delikado kaayo kay bisan pa sa kaabtik nga ihatag niini ngadto sa tawo luyo sa kagutom ug walay katulog, dili siya matagbaw sa sex.

Midugang si Javier nga mosangpot sa paghubag sa ulcer sa tinai sa tawo ug ang pagkaliso sa utok sa mogamit niini.

Gawas niini, nagkanayon si Javier nga ang kaisug sa maong druga nga makapamangtas sa tawo pagpakighilawas makadaot sa iyang kasingkasing ug mosangpot sa pagkabuang.

Miingon si Javier nga gibaligya ang matag usa ka tableta niini sa tag-P3 mil ug mahimong saw-an sa unom ngadto sa walo ka tawo.