PCAC Motabang sa mga Binilanggo

Ang Police Coordinating and Advisory Council (PCAC) maninguha nga mabuhian ang daghang binilanggo diha sa Cebu City Jail sa Barangay Kalunasan.

Ang bag-ong tsirman sa PCAC nga si Vice Mayor Edgardo Labella mibutyag nga basi sa report ni Jail Warden Johnson Calub nahibaw-an nga kapin sa 200 ka binilanggo kwalipikado unta nga makapahimulos og probation.

Basi sa balaud kadtong mga tawo nga napahamtangan og silot nga pagkabilanggo nga wala molabaw sa unom ka tuig mahimo nga mauhian ra kon moaplay ug maaproahan ang iyang probation.

Si Labella mitug-an sa mga reporters sa City Hall nga ang PCAC moawhag sa Integrated Bar of the Philippines (IBP) ug uban pa nga kahugpongan nga matabangan ang mao nga mga piniriso nga makahimo og awhag sa korte nga sila hatagan og probation.

Sa laing bahin, gibutyag usab ni Labella nga gawas sa kapin sa 200 nga makahimo unta pag-avail og probation, dunay kapin sa 1,500 ka binilanggo nga “bailable” ang mga kaso.

Ang bise mayor miingon nga ang problema mao nga walay kwarta ang nahisgutang mga binilanggo mao nga wala sila makapyansa alang sa ilang temporaryo nga kagawasan.

Sa kapin sa 2,000 ka binilanggo nga anaa karon sa Cebu City Jail, ang 528 lang kanila ang dili gayud makapyansa tungod kay gipasakaan sila og mga kaso nga maisip nga dagku og silot sagad naglamigit og drugas.

Si Labella miingon nga usa sa proyekto sa PCAC ubos sa iyang pagdumala mao ang pagpaminus sa gidaghanon sa mga binilanggo diha sa Cebu City Jail.