PCAC: Mga Tanod Angayan Bansayon sa Gimbuhaton

Gusto sa kadagkoan sa Police Coordinating and Advisory Council (PCAC) sa dakbayan sa Sugbo nga tudloan sa kapolisan ang mga barangay tanod kon unsa ang tukma nila nga mga gimbuhaton isip mga auxilliary forces.

Si PCAC Presiding Officer Jose Maria Eugene Elizalde miingon nga daghang mga bag-ong tanod karon sa lain-laing barangay, ilabi na kadtong mga barangay nga bag-o ang mga kapitan.

Matud ni Elizalde nga bisan kadtong mga tanod nga dugay na sa katungdanan angay usab nga bansay-bansayon pag-usab tungod kay dili imposible nga sila nakalimot na sa ilang katungdanan.

Dinhi sa dakbayan sa Sugbo adunay kapin sa usa ka libo ka mga tanod tungod kay ang dakbayan gilangkoban sa 80 ka barangay ug ang balaud naglatid nga ang usa ka barangay gitugotan nga makabaton og labing daghan 20 ka tanod.

Gipasabot ni Elizalde nga daku kaayo og tabang ang mga tanod kon suheto sila sa ilang katungdanan isip auxilliary forces kay ang dakbayan aduna la’y mga 1,000 ka polis ug ang 1,600 ka tanod magsilbi nga “multiplier force.”

Si Elizalde miingon nga kon makita nila nga aktibo kaayo ang mga tanod nga miabag sa kapolisan ilabi na ang pagpatrolya sa mga dapit nga sagad mahitabo ang krimen ang PCAC morekomendar nga pausbawan ang ilang binuwan nga honorarium.

Nahibaw-an nga sanglit daghang mga barangay nga dili makaabot paghatag og dagku nga honorarium sa ilang mga tanod, ang City Hall mihatag kanila og dugang allowance ingon man uban pa nga mga tabang pagpalit sa mga butang nga ilang gikinahanglan.