Pasundayag sa ‘Sugat Kabanhawan’ Gusto Ibalik sa mga Parokyano sa Simbahan

Mga parokyano sa lungsod sa Minglanilla nagpahigayon og signature campaign sa ilang awhag nga ang “Sugat Kabanhawan” ibalik og pahigayon atubangan sa simbahan aron mapahaom ang liturhiya sa maong kalihukan.

Sa milabay’ng katuigan, ang kalihukan sa Sugat diha g’yud kini ipahigayon atubangan sa simbahan apan gibalhin kini sa sports complex sa lungsod pipila ka tuig na ang milabay.

Ang mga parokyano nagkanayon nga dili sila buot nga adunay ipahigayong disko sa lugar diin ipahigayon ang Sugat.

Kagahapon sa buntag, diha nga hapit na matapos ang gipahigayon’g Misa ni Padre Arnie Visitacion, misukna kun gusto ba ang mga parokyano nga ibalik atubangan sa simbahan ang kalihukan sa Sugat ug wala’y ipahigayong disko diha sa lugar diin ipahigayon ang Sugat.

Ang mga parokyano migama dayon sa nahisgutang signature campaign sa pagpakita sa ilang baruganan nga buot nilang ibalik diha sa atubangan sa simbahan sa Minglanilla ang kalihukan sa Sugat.

Giingon nga sa maong sitwasyon ang simbahan ug ang kagamhanan sa lungsod nga maoy organizer sa kalihukan posibleng magkabangi kini sa ilang baruganan.

Ang MetroCebu News mitawag kagahapon sa mga numero sa cellphone ni Mayor Lani Peña aron makuhaan siya sa iyang pamahayag apan dili makontak.

Image Credit: travelpostbox.blogspot.com