Pasangil sa Pagpanikas,Pamalit og Botos,Ginadili nga Pagpangamgpanya, Abellanosa Gihukaran og ‘Disqualification’ ni Batuhan

Ang napilde nga kandidato sa Team Rama pagka kongresista sa south district dinhi sa dakbayan sa Sugbo miawhag sa Commission on Elections nga i-disqualify si Rodrigo Abellanosa sa iyang kadaugan sa pagka kongresista sa miagi nga eleksyon.

Sa iyang petisyon for disqualification nga giduso didto sa Comelec-Manila, si Atty Aristotle “Totol” Batuhan miingon nga grabe ang pagpanikas nga gihimo sa iyang kaatbang og maoy usa sa hinungdan nga siya napilde.

Matud ni Batuhan nga si Abellanosa nakahimo og “unlawful electioneering, vote buying ug illegal use of publication or survey” bisan atul na sa adlaw sa eleksyon.

Si Batuhan miingon nga angayang dili palingkoron sa katungdanan Abellanosa kay wala niya tumana ang balaud nga kinahanglan nga siya modaug sa usa ka matinud-anon og limpyo nga eleksyon.

Matud ni Batuhan nga bisan atul na sa adlaw sa eleksyon, si Abellanosa nagpabaha og daghang mga campaign materials nga gipaagi sa kunohay sample ballots ug mga paypay apan adunay mga ngalan sa mga kandidato sa BOPK.

Gani matud ni Batuhan nga tupad sa ngalan ni Abellanosa ug sa ubang mga kandidato nga diha sa baga nga karton nga mora’g paypay aduna pay gibutang nga oblong ug gi-shade nga susama gayud sa pagabuhaton sa mga botante didto sa presento.

Ang maong paypay nga gipanghatag sa mga botante sa tanang 34 ka voting centers sa south district gibutang usab ang giingon nga 64 percent ratings ni Abellanosa sa survey nga gihimo sa University of San Carlos (USC) samtang 37 per cent lang kang Batuhan.

Ang laing pasangil ni Batuhan nga si Abellanosa namalit og mga botos ingon man mibutang og mga propaganda materials sa wala itugot nga mga dapit.

Apan si Abellanosa wala matandog sa pagpasaka ni Batuhan og petition for disqualification kay matud niya nakasabot siya sa gibati ni Batuhan human kini mapilde og dul-an sa 25,000 botos.

Matud ni Abellanosa nga kon kini maoy makapalipay kang Batuhan human sa iyang kapildehan iya kining pasagdan.

Si Abellanosa nga alyado sa Bando Osmeña Pundok-Kauswagan (BOPK) nga ubos sa Partido Liberal giproklamar nga maoy mananaug sa pagka kongresista sa south district.

Nakakuha si Abellanosa og 124,937 botos samtang si Batuhan mikuha lang og 99,968.

Gipaabot hinoon nga si Abellanosa kinahanglang motubag gayud sa petition for disqualification nga gipasaka batok kaniya.