Pari Mihilak; Nangayog Pasaylo

● Rev. Fr. Romeo Obach nangayo’g pasaylo human sa pagkasaba niya sa dalagita nga “single mother” atol sa bunyag sa anak niini.

Tungod sa paghilak ni Rev. Fr. Romeo Obach nga nangayo’g pasaylo human sa pagkasaba niya sa dalagita nga “single mother” nga nagpabunyag sa iyang anak, ang dalagita ug ang iyang inahan nakapasaylo sa pari.

Ang 17-anyos nga inahan nakahukom nga dili na mopadayon sa pagreklamo sa pari, hilabi na kun si Fr. Obach makigkita kaniya og personal nga mangayo’g pasaylo.

Ang maong pagkasaba sa pari ngadto sa minor de edad nga inahan atol sa bunyag sa anak niini nasibya niadtong miaging adlaw sa social media ug natuki sa balita ngadto sa kaulohan. Ang maong video nakaagni og mga nigatibong commentaryo batok sa gibuhat sa pari ngadto sa dalagang inahan.

Sulat-pasaylo

Duha ka sulat nga gihimo sa pinulongang binisaya ug eningles ang gipadala sa pari ngadto sa dalagita nga nangayo’g pasaylo sa iyang nahimo sa miagi’ng Domingo didto sa simbahan sa Barangay Jagobiao, Mandaue.

Sa panagkita nila ni Fr. Obach ug sa inahan sa dalagita nga miadto sa Redemptorist Church kaniadto’ng Lunes sa hapon, ang pari migakos sa inahan sa dalagita nga naghilak ug nangayo’g pasaylo.

Nagbasol

Matud ni Father Obach nga usa ka Redemptoristang pari, nga nagbasol g’yud siya sa iyang gihimo ug nangayo og pasaylo.

Gusto g’yud hinuon sa dalagita nga makigkita kaniya ang pari ug personal nga mangayo’g pasaylo sa iyang nahimo nga
nakapauwaw kaayo kaniya.

Sa suwat sa pari nga gipadala sa dalagita siya nagkanayon:

“Tuguti ako sa pagpadayag sa akong dako’ng pagbasol sa akong sakit nga nabuhat, una sa tanan kanimo ug sa tanan nga
mga saksi. Wala g’yud nako damha nga makapamulong ako niadto atubangan ninyo’ng tanan.

“Gihinulsolan nako kini og nagpakilooy ako nga imo akong pasayloon sa gibuhat ko niadtong Hulyo 6, 2014 sa chapel sa Sacred Heart. Manghinaot ako nga maalim og dali ang samad sa atong dughan tungod niining wala gipalandong nga hitabo. Sa makausa pa, pasayloa intawon ako.”

“Andam usab ako makigkita kanimo sa imong gusto’ng panahon ug lugar aron personal ako nga makapadayag sa pagpangayo’g pasaylo,” matud sa pari.

Ang 17-anyos nga inahan miingon nga daghan kaayo ang buot motabang kaniya pinaagi sa paghimo og lakang nga matabangan siya sa Commission on Human Rights (CHR), Department of Social Welfare and Development (DSWD) ug uban pa nga ahensya sa kagamhanan.

Mapasalamaton kaayo ang batan-on nga inahan sa simpatiya sa katawhan apan nahukman na niya ug sa iyang inahan nga pasayloon lang ang pari sa iyang nahimo.

Ang 37-anyos nga inahan sa dalagita nagkanayun nga nakahatag gayud og dako’ng kahasol sa ilang pamilya ang pagkasaba ni Padre Obach ngadto sa iyang anak atubangan sa iyang mga classmates nga mitambong sa bunyag.

Apan bisan pa og nagkapinasayloay na ang 17-anyos nga inahan ug si Father Obach, ang Commission on Human Rights (CHR) motabang gihapon sa pamilya sa dalagita aron gukdon ang nakapaanak kaniya ug mibiya.

Sustento

Sila si CHR investigators Primo Cadampog ug Lilybeth Llona maoy nakig-estorya sa 17-anyos ug sa iyang inahan og gipangutana kun mopasaka ba sila og kaso batok sa pari.

Matud ni Llona nga mapugos g’yud ang amahan sa bata nga si Rio Hortelano nga mohatag og sustento tungod kay posible man siya’ng pasakaan og kaso sama sa kalapasan sa Republic Act 7610, kon Child Abuse ug Violence Against Women and Children.

Ang inahan sa dalagita miingon nga ang pagpangita sa amahan sa iyang apo maoy ilang atimanon aron kahatagan og hustisya ang iyang anak nga nagsuway gani og hikog human kalit nga gibiyaan sa nakapaanak kaniya.