Pangilinan Andam Motabang sa CCMC

● Mayor Rama mipresentar ni Pangilinan og video sa nahitabo sa CCMC human naigo sa linog kaniadtong Oktobre 18.

Ang bilyonaryo nga si Manny Pangilinan mipadayag og kaandam nga motabang sa dakbayan sa Sugbo pinaagi sa pag- “co-manage” sa Cebu City Medical Center (CCMC).

Si Pangilinan mipadayag niini atol sa ilang panagtagbo ni Mayor Michael Rama nga miawhag kaniya nga tabangan ang dakbayan sa pagpatukod og napulo ka andana nga ospital.

Sa ilang panagtagbo kaniadto’ng Sabado didto sa Manila, si Mayor Rama mipresentar ngadto ni Pangilinan og video sa nahitabo sa CCMC human sa pag-igo sa linog sa Sugbo kaniadtong Oktobre 18.

Wala kaayo mapasabot ni Rama kun unsa ang gipasabot ni Pangilinan sa termino nga “co-manage” sa CCMC. Ang tinguha ni Rama mao nga si Pangilinan mo-adopt lang og usa ka andana sa pagatukoron nga hospital. Kini nagpasabot nga si Pangilinan maoy moabaga sa gastohan sa pagpatukod og usa ka andana nga hospital building, apan wala dayon mopasalig ang magpapatigayon.

Si Pangilinan maoy tag-iya sa PLDT, Smart, part-owner sa pamantalaang Philippine Star, ug daghan pa nga mga dagko nga patigayon sa nasud.

Gibutyag usab ni Rama nga ang Operation Smile, ang kahugpongan sa mga philanthropist ug mga doktor sa lainlaing dapit sa kalibotan nga andam motabang sa nanginahanglan, mipadayag nga tabangan nila ang dakbayan pagpatukod sa bag-ong CCMC.

Ang napulo ka andana nga bag-ong CCMC nga gusto’ng ipatukod ni Mayor Rama gitumong aron maka-accommodate kini og labing minus 1,000 ka pasyente.

Daghan pa nga mga kompaniya ug magpapatigayon, apil didto sa laing nasud, gipangayoan og tabang ni Mayor Rama aron makapatukod og bag-ong ospital.

Wala panumbalinga sa mayor nga gihinganlan siya og “professional beggar” tungod sa kanunay niya nga pagpangayo’g tabang aron lang matukod ang CCMC.