Panagsabot Alang sa Drainage System Gipirmahan Na

(Cebu City PIO) — Pormal nang gipirmahan ang Declaration of Commitment and Understanding kabahin sa drainage project atol sa gipahigayon nga First Integrated Drainage Summit kagahapun, Mayo 12,2015 sa SM-North Conference Hall.

Ubos niining panagsabot ang kagamhanan sa dakbayan sa Cebu, Mandaue, ug Talisay, Probinsya sa Sugbo, ug pipila ka mga development partners diin laraw niini ang pagsulbad sa suliran ug kakuwang sa drainage system sa dakbayan sa Sugbo nga mosampot sa daling pagbaha sa dakbayan.

Gituki sa maong kasabotan ang iligal nga pagtukod ug panimalay sa mga informal settlers dapit sa suba, sapa o uba pang bahin sa tubig diin makababag sa pagdagayday niini.

Nasayran usab nga ang improper waste disposal o pagpataka ug labay sa mga basura ngadto sa tubig maoy rasun sa daling pagbaha sa dakbayan tungod sa nagpundong mga basura.

Tumong sa kasabutan ang paghatag og daling aksyun sa drainage issue sa dakbayan ug ang pagmugna sa gitawag nga multi-sectoral Task Force nga magsilbing environmental law enforcers.

Gipadayag ni Cebu City Mayor Michael L Rama ang iyang panghinangop ug kalipay sa suporta nga gipadangat nila ni Talisay City Mayor Johnny V. Delos Reyes, Mandaue City Mayor Jonas C. Cortes ug Cebu Provincial Governor Hilario P. Davide III.

Gidayeg usab sila ni Mayor Rama sa mga kalambuan nga nahimo sa ilang pagdumala.

Matud sa Mayor nga mag-andam kanunay kay dili kontrolado ang dagan sa panahon ug balos sa kina-iyahan. (Cebu City Public Information Office PIO)