Pampasaherong Sakyanan nga di Mohatag og Discount, Kuhaan og Prangkisa

(PIA7) — Nipasidaan ang Land Transportation Franchising and Regulatory Board (LTFRB) sa mga pampasaherong sakyanan nga tanggalan kini og prangkisa sa higayong mapamatud-ang wala mosunod sa balaod kalabot sa paghatag og 20% discount sa mga estudyante, senior citizen ug sa mga tawong may kabilinggan sa panglawas (PWDs) nga ilang pasahero.

Matud pa sa LTFRB, ang molapas sa balaod kalabot sa paghatag sa maong diskuwento sa mga nahisgotan, pahamtangan og multa nga P1,000 hangtud P5,000 gawas pa sa kanselasyon sa ilang prangkisa.

Matud pa ni Atty. Veronica Peralta sa LTFRB, kabalo ang mga passenger vehicle drivers sa maong balaod sa paghatag og 20 porsiyentong diskuwento sa maong mga indibidwal apan tungod kay may pipila nga dili gustong makuhaan ang ilang kita, dili na mohatag sa maong diskuwento.

Tungod niini, nanawagan ang LTFRB sa publiko nga ireklamo sa ilang ahensiya ang mga nahibaw-ang mga sakyanan nga dili mohatag og diskuwento sa mga estudyante, senior citizen ug PWDs aron mapahamtangan kini og silot. (mbcn/ecb/PIA7-Bohol)