Pamilya Archival Supak nga sa Manila Husayon ang Kaso

Nahadlok g’yud ang mga opisyal sa PNP Highway Patrol Group-7 nga mapilde sila sa kaso nga may kalambigitan sa pagbanhig-patay ni Atty. Noel Archival kun ang kaso anhi imbestigahon sa Sugbo.

Nagtuo ang mga sinumbong nga opisyal sa HPG-7 nga ang mga piskal dinhi sa Sugbo nakumbinsir na g’yud nga sila apil sa pagpatay kang Archival mao nga gusto nila nga adto kini husaya sa Manila.

Ang gipasakaan og kaso nga multiple murder ug frustrated murder sa National Bureau of Investigation (NBI) mao sila si Senior Superintendent Romualdo Iglesia, Senior Inspector Joselito Lerion, Chief Inspector Eduardo Mara, SPO4 Edwin Galan og PO1 Alex Bacani.

Ila’ng gusto nga huwaton usa sa mga piskal ang resulta sa awhag nila sa Department of Justice (DOJ) nga adto sa Manila husaya ang kaso sa dili pa mohimo og preliminary investigation ang mga piskal.

Ang mga opisyal sa HPG-7 gitumbok nga nalambigit pagbanhig ni Archival ug kaubanan didto sa Barangay Corro, Dalaguete kaniadtong Pebrero 18. Gawas ni Archival, duha ka kauban sa abogado ang napatay ‘sab ug laing usa ang naangol.

Gisupak sa kabanayan ni Archival nga adto sa Manila husayon ang kaso kay sakripisyo na kaayo kini ang pagtambong nila sa husay.

Samtang ang NBI ‘sab Myerkules kagahapon misang-at og dugang ebidensya sa piskalya nga gituohan nila nga makapasamot sa kalig-on sa ilang gipasaka nga kaso batok sa mga opisyal sa Highway Patrol.

Matud sa NBI nga bisan og napasaka na nila ang kaso sa piskaliya padayon pa sila nga nangapkap og ebidensya sa kaso.

Samtang ang abogado sa mga HPG-7 misang-at og Supplemental Motion sa nahauna na nga Motion to Quash Search Warrant nga ilang giduso sa hukmanan aron ipadeklarar nga inbalido ang search nga gihimo sa NBI.

Matud sa abogado sa HPG nga bisan dili apil sa butang nga gibuta’ng sa korte nga sakmiton, gikuha pag-apil sa NBI ang log book sa gwardiya nga nagbantay sa maong ‘impounding area’ sa mga sakyanan sa HPG.

Didto sa logbook nahibaw-an nga ang mga sakyanan nga gigamit sa mga mipatay ni Archival kabahin diay sa mga gipang-impound sa HPG apan gigamit-gamit nila human pang-ilisi ang mga plate numbers.