Pagtukod sa Eskuelahan sa Brgy Ermita, Kapin 30 Ka-Pamilya Apektado

Ang Committee on Social Services sa Cebu City Council walay pagsupak nga tabangan sa dakbayan ang kapin sa 30 ka pamilya nga maapektahan sa pagmugna og tunghaang publiko sa Barangay Ermita.

Matud ni Konsehal Gerardo Carillo, tsirman sa Committee on Social Services, nga dili supak sa balaud kon hatagan og relocation site o kaha financial assistance ang mga nagpuyo sa Mandatan Building.

Ang mao nga building nga nahimutang sa Barangay Ermita gipuy-an kini sa kapin sa 30 ka pamilya nga Muslim og sila papahawaon na kay ang mao nga dapit tukoran na og tunghaan.

Ang Ramon Aboitiz Foundation Incorporated (RAFI) maoy motabang nga ang Barangay Ermita makaangkon og tunghaan nga kantidad og P13 milyones.

Si Konsehal Carillo mihimo og committee report nga mihatag og pabor sa resolusyon ni Konsehal Alvin Dizon nga magpahatag og tabang sa mga apektado nga pamilya.

Ang mga konsehal miingon nga anaa na ni Mayor Michael Rama kon unsaon niya pagtabang ang mga pamilya nga maapektahan sa pagmugna og tunghaan sa Barangay Ermita.