Pagtukod sa Bag-ong CCMC, Mulanat Pa

Madugay-dugay pa g’yud ang pag-estar sa mga pasyente ug kawani sa Cebu City Medical Center (CCMC) diha sa Fire Department building sa Natalio Bacalso Avenue nga maoy gigamit karon nga temporaryo nga ospital.

Si Dr. Shawn Espina, amahan ni Architect Miko Espina, nga maoy nagdisinyo sa pagatukoron nga bag-ong CCMC building, miingon nga bisan og kasugdan pa dayon ang proyekto maabtan gihapon sa sunod tuig ang kahumanan sa bag-ong ospital.

Sila si Dr. Espina ug Architect Espina mitambong sa sesyon sa Cebu City Council sa Myerkules og mipresentar ang duha sa ilang gihimo nga disinyo sa bag-ong ospital nga nagkantidad og dul-an sa usa ka bilyon ka pesos.

Si Konsehal Margarita “Margot” Osmeña, majority floor leader sa Cebu City Council, miingon nga kon magtan-aw ka sa disinyo sa building nga gihimo ni Architect Espina, makadayeg ka g’yud kay susama kini tan-awon og private hospital.

Apan si Osmeña miingon nga ang nakaproblema mao nga wala pa’y kwarta ang dakbayan sa Sugbo aron magamit sa pagtukod sa mao nga hospital building.

Basi sa presentasyon ni Architect Espina, nasayran nga unahon sa maong proyekto ang pagguba sa CCMC building ug ang pagbalhin niini sa karsada diha sa dapit nga nahimutangan karon sa ospital.

Ang bag-ong hospital building anha tukora sa dapit tupad sa fire department building ug masakop niini ang karsada nga kabahin sa Panganiban mao nga ang karsada balhinon gikan sa iyang nahimutangan.

Ang dakbayan sa Sugbo pagka karon nakatigum pa lang og mga siyam ka milyon ka pesos sa iyang gilusad nga “peso-peso fund drive” aron madugang sa gastohon pagpatukod sa bag-ong ospital.