Pagtinapolan tungod sa kakulian sa lawas, dili balda sa pagpangitag panginabuhian

Kadtong mga tapolan nga nagsalig lang sa pagpakilimos, angay sila nga mauwaw kay aduna gani mga buta nga mitrabaho g’yud pinaagi sa pagpatulo sa ilang singot og nakapa-eskwela g’yud sa ilang mga anak.

Si Nicolas Silot, 52-anyos na ang edad, usa sa angay’ng isipong idolo niadtong mga tapolan sama anang uban nga mangilkil lang sa mga drayber ug ang uban ‘sab magpakilimos sa mga pasahero sa jeep og sa mga nagmaneho’g awto.

Duha sa anak ni Kolas nakalampos gayud sa ilang pagtoon og nakahuman sa Industrial Engineering course, ang usa nagpadayon pa sa pag-eskwela.

Gawas ni Kolas, daghan pa nga mga tawo nga napagngan sa kahayag nga nanginabuhi nga wala gayud magsalig sa pagpangayo og kwarta sa ubang tawo.

Aduna sila’y kahugpongan sa mga buta bisan og nagbuwag-buwag sila sa pagpuyo dinhi sa dakbayan. Dunay pundok sa mga buta nga anaa magpuyo sa yuta sa probinsya sa Barangay Apas, dakbayan sa Sugbo.

Nanginabuhi sila pinaagi sa pagmasahe niadtong mga tawo nga gikapoy ang kalawasan.

“Mabuhi man g’yud ang tawo boss kon molihok lang. Dili ‘sab ko magpakilimos kay mauwaw ko,” matud ni Kolas nga karon nagpuyo sa Sitio Living Water, sakop sa Basak-San Nicolas, dakbayan sa Sugbo.

Gisuginlan ko ni Kolas nga dunay mga higayon nga magsakay siya og public utility jeepney (PUJ) dunay mohatag kaniya og kwarta apan iyang balibaran.

Anaa si Kolas kanunay magmasahe sa mga kawani sa Casino-Filipino sa Waterfront Hotel. Usahay mokita gani siya og kapin sa usa ka libo ang adlaw, usahay ‘sab P800.

Utso-anyos pa nga si Kolas napagngan sa kahayag. Gihilantan siya og tungod sa pagsigi’g katulog matud pa maoy nakaingon sa iyang pagkabuta.

Gikan sa ilang dapit sa Bais City, Negros Oriental, mitabok si Kolas dinhi sa Sugbo pag-edad niya og 21-anyos og mitungha sa Cebu Blind Rehabilitation Center sa Labangon.

Gitudloan sila sa mga kawani sa Department of Social Welfare and Development (DSWD) nga kaniadto ginganlan pa og Social Welfare Administration (SWA).

Utang ni Kolas sa SWA ang iyang nakat-onan nga abilidad sa pagmasahe, labaw na ang paglakaw nga wala na kinahanglana nga aduna pa’y tawo nga mogiya kaniya.

Ang iya ra nga sungkod maoy iyang kauban. Bisan gani og magsakay og kotse o PUJ si Kolas, mahibawo siya kon unsa na nga lugar ang ilang naabut.

Kon kining tagsulat motawag kaniya sa iyang selpon, bisan asa siya nga dapit makatultol gayud siya sa akong balay sa Barangay Apas aron iya ko nga serbisyohan.