Pagsemento sa S. Osmeña Blvd. Gipahonung sa DENR-7

Gipahunong sa Department of Environment and Natural Resources (DENR) – 7 ang P289 milyones nga proyekto sa pagsemento sa Sergio Osmeña Boulevard, Mabolo, Cebu City human kini luwati ni DENR-7 Regional Executive Director Isabelo Montejo og Cease and Desist Order.

Kini human namatud-i nga gilapas sa Department of Public Works and Highways(DPWH-7) ang mga kondisyon sa pagkabra sa 145 ka mga punoan sa kahoy sa center island sa naasoy nga dalan.

Sigun pa sa tigpamaba sa DENR-7 Dr. Eddie Llamedo ang nag-unang nalapas sa DPWH-7 mao ang panginahanglan nga superbisahan sa DENR ug sa Parks and Playground Cebu City hall ang pagkabra sa karsada nga sementohonon.

Laing wala matuman sa naasoy nga proseso mao ang pag-andam na sa mga luna nga balhinan sa mga tanom sa Mahiga creeks, San Pedro Calungsod Shrine ug sa Barangay Lorega triangle.

Miingon si Llamedo nga human mahawan ang yuta angay unta nga ikatanom dayon ang mga kahoy sa pagsiguro nga mabuhi kini.

Gipasabot usab ni Llamedo nga ang nagkuha sa naasoy nga mga kahoy kun mailhan mapasakaan og kasong kalapasan sa Presidential Decree 943 nga mao ang Foresty Law.

Samtang gitumbok ni Konsehal Dave Tumulak nga pinaagi sa ilang CCTV camera nga gimontar sa naasoy nga lugar, makita kun si kinsa ang nagkuha sa naasoy nga mga kahoy.

Kini ang hinungdan nga gisulod kagahapon sa buntag sa ginsakpan sa Community Environment and Natural Resources Office (CENTRO) ang yarda sa WT Construction didto sa lungsod sa Consolacion.

Bisan kun gibabagan sa unang higayon, gipasulod sila sa pagkahapon na.

Ang mga kawani sa CENRO wala nay nakitang mga tanum gawas lamang sa pipila ka mga layang dahon sa lomboy nga usa sa mga kahoy nga gipangita sa DENR.

Image Credit: www.philstar.com