Pagplaster sa Baba sa Masuso, Pa-imbistigaran sa Senado

Hayan nga ang kontrobersyal nga pag-plaster sa baba sa masuso’ng bata diha sa Cebu Puericulture Center and Maternity House mahimoan g’yud og imbestigasyon sa mga sakop sa Senado.

Si Senador Nancy Binay misugyot og resolusyon nga himoan g’yud og Senate Inquiry sa mga hingtungdang komitiba sa Senado ang gikatahong gihimo sa usa ka nurse sa maternity house sa pagpilit og plaster sa baba sa bata aron dili na kini makahilak.

Matud ni Binay nga angay’ng himoan og imbestigasyon ang gibuhat nga pangabuso sa maong nurse.

Samtang ang kadagkoan sa Commission on Human Rights (CHR), kapolisan ug Department of Social Welfare and Development (DSWD) naghimo na usab og lainlaing pakisusi sa gihimo sa nurse ug gani mibahad nga mokiha batok sa nurse kun makakuha og lig-on nga basihanan.

Ang anak ni Bise Presidente Jejomar Binay miingon nga ang Senate Inquiry gitumong aron mapangitaan og paagi nga malikayan ang susama nga panghitabo sa umaabot nga higayon.

Samtang si Cebu Archbishop Jose Palma adunay awhag sa tagdumala sa maternity hospital nga mihimakak sa pasangil bahin sa reklamo sa ginikanan niadtong bag-ong natawo nga bata nga gipapitlan ang baba og plaster.

Gibutyag ni Palma nga kita’ng tanan adunay responsibilidad sa pag-amping sa usa’g-usa ilabi na niadto’ng mga tawo nga walay kapasidad sa paghimo niini.

Si Palma miingon nga makapasagmuyo ang nahitabo sa bata tungod kay ang mibuhat niini mao man ang tawo nga gitugyanan unta nga mohatag og pagtagad sa bata.

Mihimo og pag-ampo ang Arsobispo nga kadtong mga nalambigit sa isyu dawaton nila ang kasaypanan nga ilang nahimo ug mangayo og pasaylo.