Paglapas sa taga Crame sa Balaud Gikasuko ni Rama

Pwerteng sukoa ni Mayor Michael Rama pagkasayod nga ang Camp Crame mitudlo na diay ni Senior Superintendent Mariano Natuel isip “full-pledged director” sa Cebu City Police Office (CCPO) sugod kaniadtong Mayo 10.

Giangkon ni Natuel nga gusto ra unta niya nga ihilom ang pagtudlo kaniya sa Camp Crame isip direktor sa kapolisan dinhi sa dakbayan sa Sugbo aron nga dili masuko pag-ayo ang mayor apan nahibaw-an kini sa mga sakop sa media.

Matud ni Mayor Rama nga nakalitan kaayo siya pagkasayud sa report og daw dili siya makatoo kay bag-ohay pa lang gani siya nga miadto sa Camp Crame og nakighinabi ni Philippine National Police (PNP) Chief Allan Purisima.

Si Rama nagkanayon nga malaumon gani siya nga si Purisima motudlo na ni Senior Superintendent Noli Romana nga maoy direktor sa kapolisan sa dili pa magsugod ang bag-o niya nga termino pagka mayor karong Hulyo 1.

Gipahinumdoman ni Rama ang kadagkoan sa kapolisan, apil na si Police Regional Office (PRO)-7 Regional Director Marcelo Garbo nga hayan putlon na sa City Hall ang paghatag og hinabang sa kapolisan tungod sa wala nila pagtuman sa balaud.

Ang dakbayan naghatag og tag P2,000 sa matag usa sa kapin sa 900 ka polis nga ania madistino sa dakbayan, mga sakyanan ug gasolina alang sa kapolisan.

Gawas niana ang City Hall dunay pa’y ubang gahin nga gihatag sama sa pagpaayo sa gubaon na unta nga building sa CCPO.

Gihulagway sa ubang opisyal sa kapolisan nga kon ang City Hall mo-pull out sa tanang mga sakyanan ug dili na mohatag og hinabang sa kapolisan, apektado ang pagmentinar sa peace and order.

Si Rama miingon nga mohatag siya og dugang kumentaryo kabahin niini kon masuta niya nga dayonon gayud sa Camp Crame ang pagtudlo kang Natuel isip full-pledged director sa CCPO.

Ubos sa balaud ang kadagkoan sa Camp Crame, pinaagi sa PRO-7, igo lang moendosar ngadto sa mayor og labing minus tulo ka ngalan sa mga opisyal nga pilian niini aron itudlo nga hepe sa kapolisan.

Matud ni Rama nga dili mahimo nga supakon sa kadagkoan sa Camp Crame ang balaud.