Pagkawagtang sa ‘Dakit’ Giimbistigar sa DENR-7

Human sa pagkahanaw sa mga kahoy nga gitanum sa center island sa Sergio Osmeña Boulevard ning syudad sa Sugbo, ang Department of Environment and Natural Resources (DENR)-7 mipahibawo nga ila na usab nga giimbestigar ang gikatahong pagputol sa Department of Public Works and Highways (DPWH)-7 ug sa mga contractor niini sa dako ug tigulang na kaayong kahoy nga balete kun dakit tungod sa road widening project sa dalan M. Velez.

Suma pa ni DENR-7 Regional Executive Director Dr. Isabelo R. Montejo nga ang iyang buhatan mipadala ni forester Raul Pasoc ug Felimon Embalzado Jr. sa Community Environment and Natural Resources Office Cebu City aron sa pag-imbestigar kinsa ang may tulubagon sa illegal nga pagputol sa dakit nga may 130 centimeter nga diameter ang gidak-on sa punoan, ug ingon man sa upat ka punoan sa Narra, usa ka punoan sa Talisay, ug duha ka punoan sa Mahogany.

Sa pasiunang pakisusi, nasayran ni Montejo nga base sa pagpakighinabi ni Pasoc ni JJ and J Construction and General Merchandise Site Engr. Alfred Tio nga usa ka Engr. Reynaldo Padillo sa construction division sa DPWH-7 maoy mimando kanila sa pagpaputol sa dakit nga nahimutang kaniadto sa kilid sa taytayan sa M. Velez niadtong ikaduhang semana sa bulan sa Abril ning tuiga.

Sa imbestigasyon usab ni Pasoc nasayran nga ang ubang mga kahoy gi-earth-ball ug gitanom didto sa San Pedro Calungsod Shrine apan hapit na kining mamatay tungod kay gamay ra kaayo ang porsyento sa survival rate sa maong mga kahoy.

Sigon pa ni Montejo nga ila na karong gitun-an ang ilang tukmang lakang base sa nakuha niining mga ebidensiya sa laing pagpatumol sa kahoy nga apektado sa proyekto sa DPWH.

Subay niini, si Montejo kusganong miawhag sa DPWH-7 nga dili magpasagad sa pagputol og mga kahoy nga maapektohan sa road widening projects niini.

Gitumbok niya nga ang ilang buhatan wa gyud moluwat og permiso nga nagtugot sa DPWH-7 sa pagputol sa maong mga kahoy.

“We have not issued the appropriate permit on the trees to be affected as there are some conditions or requirements which have not been complied with by DPWH-7,”sigon pa ni Montejo.

Gipasabot ni Montejo nga bisan og si DENR Undersecretary for Field Operations Demetrio Ignacio Jr. mihatag og clearance sa DPWH niadtong Marso 26 ning tuiga alang sa gitakdang “earth-balling” sa mga kahoy, ang maong clearance wala magpasabot nga gitugotan na ang DPWH-7 ug mga contractor niini sa pagputol sa naasoy nga mga kahoy kay lahi man ang permiso sa pagputol ug kahoy ug sa earth-balling o pag-ibut sa kahoy.