Pagdumala sa Warwick-Barracks, Gitugyan sa Syudad

Ang kadagkoan sa dakbayan sa Sugbo miingon nga bisan og ang yuta nga nahimutangan sa Warwick-Barracks market gipanag-iya sa nasudnong kagamhanan, gitugyan ngadto sa dakbayan ang pagdumala niini ug wala kini gitumong aron katukoran og kabalayan.

Matud ni City Engineer Jose Marie Poblete nga si kanhi Presidente Diosdado Macapagal miisyu og proklamasyon kaniadtong 1964 nga ang kanhi barracks sa mga sundalo’ng Amerikanhon diha sa Barangay Ermita himoon na nga merkado ug gitugyan sa dakbayan ang pagdumala.

Mga kanhi nagpuyo sa Warwick-Barracks market sa wala pa masunog kaniadtong miaging buwan, mitambong sa executive session sa mga konsehal kagahapon ug gipadayag nila ang awhag nga tabangan unta sila sa kagamhanan nga mahatagan og luna nga kabalhinan.

Kapin sa 20 ka pamilya ang temporaryo karon nga gipapuyo sa mga tulda diha sa ilawom sa tulay sa South Coastal Road atbang sa Sitio Bato, Ermita, apan palayason na usab sila sa Cebu Port Authority (CPA) diha sa ilang nahimutangan.

Ang mao nga mga lumulopyo nga nagpuyo kaniadto sa Warwick-Barracks market nag-ambahan kagahapon sa Cebu City Hall apan ang ila ra nga presidente nga si Perla Eraya maoy gihatagan og higayon nga makasulti.

Si Ermita Barangay Kapitan Felicisimo “Imok” Rupinta miingon nga nangindahay unta sila nga ang dapit sa Warwick-Barracks katukoran og building nga katindahan ug sa samang higayon mahimong kapuy-an.

Matud ni City Administrator Lucelle Mercado nga abli sila sa mao nga hangyo sa mga lumulopyo apan mitataw nga ang tinguha nila karon mao ang pagpanindot sa Carbon Market.

Bisan si Kapitan Rupinta pabor nga ang kabahin sa Warwick Barracks nga nag-atubang sa Unit 1, Carbon Market, himuon nga parking area aron makapadasig og dugang kustomer ang merkado sa Carbon.