PAGASA-Mactan: Ulan Atol sa Sinulog Grand Parade

Ang mga motambong sa kalihukan sa Fiesta ni Senyor Santo Niño ug sa Sinulog Grand Parade kinahanglan g’yud nga magdala’g payong kay sugod karong adlawa sa Huwebes hangtud sa Dominggo kanunay na nga masinati ang uwan.

Si Oscar Tabada nga maoy chief weather specialist sa Philippine Atmospheric Geophysical Astronomical and Seismology Administration (Pagasa)-Mactan, miingon nga kusog kaayo ang uwan sa Huwebes.

Matud ni Tabada nga nagumikan kini sa tropical depression nga nagsingabot, apan dili hinoon apektado ang Sugbo gawas lang sa uwan-uwan nga magsugod karong adlawa sa huwebes ug kusog kaayo ugmang adlawa sa byernes.

Kon mahitabo ang kusog nga uwan, apektado niini ang ‘Misa de Translacion’ nga mao ang pagbalhin sa imahen ni Santo Niño gikan sa Basilica paingon sa Saint Joseph Parish sa Mandaue.

Sa Umaabot Sabado, apektado usab ang Fluvial Procession ilabi na nga matud ni Tabada ang uwan usahay ubanan og panagsa nga hangin nga kuyaw kaayo sa mga gagmay’ng sakyanan sa kadagatan.

Apan matud ni Tabada nga sanglit ang fluvial procession anha man ipahigayon sa Mactan Channel, dili kaayo dagku ang bawod.

Ang mga mosalmot sa solemn procession sa imahen ni Santo Niño inigka Sabado sa hapon apektado usab tungod sa padayong pag-uwan-uwan.

Matud ni Tabada nga sa Dominggo atul sa pagpahigayon sa Sinulog Grand Parade masinati g’yud ang uwan-uwan. Kon mag-uwan apektado kaayo ang mga dancing contingent kay mobug-at man ang ilang paglihok.

Si Mayor Michael Rama miingon nga magpaabot lang sila sa milagro ni Santo Niño nga pakgangon nini ang mga kakulian sa pagpahigayon sa mga kalihukan pahaum sa iyang pangilin.

Image Credit: cesolondriz.blogspot.com