Pag-oktaba sa Oath Taking Gikasubo sa mga Bag-ong Abogado

Nasagmuyo ang pipila ka mga Sugboanon nga nakapasar sa Bar Examination sa tuig 2013 nga naoktaba ang ilang gikatakdang oath taking kaniadto untang miaging Lunes Abril 28, 2014.

Kini tungod kay gikahinaman nila kini sa hingpit nga mahimong abogado ug makasugod na sa profession niini.

Apan si Integrated Bar of the Philippines (IBP) Cebu city chapter President Atty. Elaine Bathan mipasabot nga bug-at usab kaayo ang rason sa Korte Suprema sa pag-reschedule sa oath taking ceremony sa nakapasar sa 2013 bar exam.

Nasayran nga ang pagbisita sa presidente sa Estadus Unidos nga si Barack Obama maoy nag-unang hinungdan nga gi-reschedule sa Korte Suprema ang oath taking ceremony sa 1,174 ka mga law graduates sa nagkadaiyang mga tulunghaan sa nasud kinsa nakapasar sa 2013 Bar Exam gikan sa Abril 28 ngadto na sa Mayo 5 ning tuiga.

Si Atty. Bathan mitug-an nga normal lamang kini nga reaction sa mga napasar sa bar exam tungod kay gikahinaman man nila ang maong okasyon.

Iya usab nga gitataw nga ang Korte Suprema mitan-aw usab nga ang oath taking ceremony sa mga bar exam passers usa ka dakong okasyon ug magkinahanglan usab og dakong preparasyon sa siguridad sa nasud, kini tungod kay nagkadungan ang maong okasyon sa mga bag-ong abogado ug ang pagbisita ni Obama sa Manila.

Midugang si Bathan nga nasayod siya nga ang mga bag-ong mga abogado makapaabot hinuon sa pipila lamang ka adlaw alang sa ilang pagpanumpa isip hingpit na nga abogado.