Pag-Ihaw Daplin sa Dalan, Ipahunong

Si Mayor Michael Rama mimando nga ipahunong ang pagpangihaw ug paglimpyo sa inihaw nga kahayopan diha daplin sa New Imus Road sakop sa Barangay Lorega San Miguel panahon sa gabii.

Ang pagpangihaw og kahayopan diha daplin sa New Imus Road gihimo kay gihunong pa ang pag-ihaw sa kahayopan didto sa ihawan sa dakbayan sa Sugbo sa North Reclamation Area samtang nagpadayon pa ang pag-ayo sa ihawan.

Matud pa sa mayor nga angay kining hunongon dayon ang kalihukan kay wala kini itugot sa balaod nga bisan asa ra himoa ang pagpangihaw og kahayopan.

Daghang negosyante og karne ang naproblema kay ang kadagkoan sa Cebu City Abattoir dili na modawat og ihaw sa ilang mga baboy tungod kay wala pa maayo ang waste water treatment system sa ihawan.

Sa milabay’ng katuigan, ang hugaw gikan sa ihawan direkta ra nga gipaagas ngadto sa Mahiga Creek, apan ang mayor sa Mandaue mipadala og suwat ni Mayor Rama nga nagpahinumdom nga illegal ang gihimo sa dakbayan.

Ang ihawan sa dakbayan sa Sugbo wala tuyoa nga anaa matukod sa yuta nga samtang titulado kini sa Cebu City government apan nasakop na kini sa teritoryo sa dakbayan sa Mandaue.

Dihang gisusi kini sa mga sanitary health inspectors sa Mandaue, nasuta nga nakalapas kini sa balaod ug gihulagway nga hugaw.

Si City Veterinarian Pilar Romero miangkon nga giawhag nila ang negosyante og mga karne nga adto lang magpaihaw sa mga pribadong ihawan sa ilang mga baboy nga motimbang og 50 kilos paubos.

Matud ni Romero nga kadto ra’ng mga dagko’ng baboy nga sobra sa 50 kilos maoy ilang ipaihaw diha sa ihawan sa dakbayan. Usa ka negosyante og karne mitug-an sa media sa ilang problema.

Ang mga mangingihaw og ang tagdumala sa mga ihawan sa Mandaue, apil na gani sa Consolacion, mosugot nga adto ihawon sa ilang ihawan ang mga hayop apan kinahanglan nga adto usab ibaligya sa ilang dapit ang mga karne.

Kun ang mga karne dad-on dinhi sa dakbayan sa Sugbo, ang tagdumala sa mga ihawan sa Consolacion ug Mandaue dili mosugot nga ang giihaw nga baboy adto limpyohan sa ilang ihawan.

Tungod niini, napugos ang mga negosyante og karne nga anha ihawon ang baboy sa ihawan sa dakbayan sa Sugbo diha sa North Reclamation Area apan anha sila maglimpyo pinaagi sa pagkuha sa mga tinai ug uban pa sa daplin sa mga karsada.

Ang paborito nga karsada nga anha sila mag-ihaw ug mag-kaskas kon maglimpyo sa mga karne mao ang New Imus Road duol sa Barangay Lorega-San Miguel, diin anaa kadaghanan nagpuyo ang mga mangingihaw.

Si City Health Officer Daisy Villa miingon nga kalapasan sa Sanitary Code ang pag-ihaw og kahayopan diha sa dapit nga wala giisip nga ihawan.