Pag-IBIG Mipahigayo’g ‘Media Pasalamat’

Mapasalamaton kaayo ang tagdumala sa Home Development Mutual Fund (Pag-IBIG Fund) sa mga myembro sa Cebu Media tungod sa pagpublikar niini sa ilang mga kalihokan sa tibuok tuig.

Si Vicky B. dela Peña, Pag-IBIG Vice President for Membership Visayas and Mindanao sa iyang pamahayag atubangan sa mga myembro sa radio, television ug pamantalaan, nagkanayon nga gihimo nilang espesyal nga kalihokan ang ilang pagpakigkita sa taga media.

Gitawag nga “Media Pasalamat”, kini gipahigayon didto sa Sarosa International Hotel, sa barangay Mabolo, Cebu City niadtong Lunes, Dec.22, 2014, sa gabii.

Miingon si Dela Peña nga ilang gihimo kining maong Media Pasalamat matag buwan sa Decembre matag tuig agi og pag-ila sa dakong natampo sa taga media sa pagpaibawo sa katawhan bahin sa ilang mga programa.

Ang Pag_IBIG nga ahensya sa kagamhanan alang sa pinuy-anan, mitumaw niadtong tuig 1980 ug liboan na ka pamilya ang nakapahimus sa ilang programa.

Matag higayon nga mopatawag sila og Press Conference sa taga media, dili sila mapakyas ug ikasabwag dayon ngadto sa publiko ang ilang mga programa bahin sa pagpatukod og panimalay sa Visayas ug Mindanao.

Dili lamang mga balay ang kapahimuslan sa mga myembro sa Pag-IBIG, kundili makahuwam usab og kuwarta ang mga matag membro nga nanginahanglan niini.