Pag-Ayo sa mga Tunghaan sa Dakbayan sa Sugbo Nag Padayon

Nagpadayon pa gihapon ang konstruksyon ug rehibalitasyon sa mga tunghaan sa dakbayan sa Sugbo nga labing apektado sa bagyong Odette. Kahinumduman nga Disyembre 16 sa miaging tuig miigo ang maong bagyo diin ang Sugbo ang usa sa mga labing apektado niini.

Matod ni Melissa dela Cruz, Chairperson sa Cebu City Local School Board (LSB) nga “work in progress” pa ang pagtukod ug balik sa mga tunghaan nga gi guba sa maong bagyo. Nasayran usab nga ang Department of Education (DepEd) mi issue na ug mando may labot sa face-to-face classes sugod Nobyembre karong tuiga.

Mukabat ngadto sa P300 million ang kantidad sa danyos sa bagyong Odette sa nagkadaiyang mga tunghaan sa dakbayan.

Samtang sa 126 nga pampubliko ug pribadong tunghaan sa dakbayan, 100 na niini ang nakahatag ug request for assistance sa LSB. Gibutyag ni dela Cruz nga sagad sa mga danyos mao ang atop sa mga tunghaan.

Sa pagkakaron, dili pa hinuon mapasalig ni dela Cruz kung kanus-a maayo ang tanang mga tunghaan apan ang LSB hugot ang pakigtambayayong sa DepEd aron mas ma paspasan ang trabaho. (RM)