Pag-Asa: Temperatura sa Sugbo Misaka Na

Gipasidan-an sa Pag-Asa-Mactan ang publiko nga nagsugod na ang pagsaka sa temperatura sa Sugbo ug sa Central Visayas tungod sa pag-igo sa El Niño o panahon sa subrang kainit sa panahon.

Sumala pa sa hepe sa Pag-asa Mactan Oscar Tabada nga sugod niadtong Sabado misaka na sa 31 hangtud 32 Degree Celsius ang labing taas nga temperatura nga sagad masinati dinhi sa Sugbo.

Apan gitataw ni Tabada nga sa sunod bulan sa Abril gipaabot nga mosaka pa ang kainiton sa panahon ngadto sa 34 Degree Celsius ang temperatura.

Tungod niini, si Tabada miawhag sa publiko nga dili magpainit sa adlaw kay ang subrang kainiton sa panahon makadaot sa lawas ilabina niadtong mga tawo nga may taas nga alta presyon ug delikado usab kini sa panit ug ingon man sa mata.

Matud pa ni Tabada nga dilikado kaayo sa mga tawo kining ultra violet radiation gikan sa adlaw ilabi na ang init nga gikan sa alas 10:00 sa buntag hangtud sa alas 3:00 sa hapon.

Busa iyang giawhag ang publiko nga likayan ang pagbuwad sa init sa maong mga takna kay daghan na ang kaso karon sa skin cancer ingon man sa pagkahap sa mga mata.

Apan ang labing peligro sumala pa sa hepe sa Pag-Asa nga labing masinatian sa tanan ang subrang kainit sa panahon karong bulan sa Abril. Hinuon makasinati usab og pag-ulan-ulan sa bulan sa Mayo, apan mobalik ang subrang kainit sa bulan sa Hunyo hangtud na sa Decembre ning tuiga.

Gitumbok isab ni Tabada nga adunay “15 percent probability” nga ang labing dakong epekto sa El Niño moigo sa katapusang quarter ning tuiga gikan sa Oktobre hangtud sa Desyembre.

Dugang pahimango sa Pag-asa ngadto sa mga tawo nga buot maligo sa dagat nga nga dili malimot sa pagbutang sa lawas niini og protected oil aron dili kini masunog sa kainit sa adlaw.

Image Credit: www.lasvegasmanblog.com