P30M Burial Cash Assistance, Nahurot Na

Nahurot na ang P30 milyones nga budget sa dakbayan sa Sugbo nga gigahin aron ihinabang sa mga kabus nga pamilya nga mamatyan og kabanay, matud pa ni Ruben Baculi, ang gitugyanan pagdumala sa pagpanghatag og burial cash assistance.

Si Baculi miingon nga kanunay’ng magkuwang ang ilang kwarta kay kuwang ang budget nga giaprobahan sa Cebu City Council.

Gisugyot unta ni Baculi nga P45 milyones ang kantidad nga igahin alang sa burial cash assistance apan matud niya, P30 milyones lang ang gitugtan sa konseho.

Mao kini ang rason nga ang kwarta nahurot na kay gigamit nila sa pagbayad sa “pending” nga hataganan sa miaging tuig. Ang sobra niini gigasto na usab nila apan kutob na lang karong buwana.

Ang opisina ni Baculi modawat gihapon og aplikasyon alang sa cash assistance gikan sa kabanayan sa namatay nga taga dakbayan sa Sugbo, apan dili kini dayon kahatagan sa kantidad.

Ang ordinansa sa dakbayan naglatid nga ang pamilya nga taga dakbayan sa Sugbo nga mamatyan og kabanay makadawat og kantidad nga P10 mil.

Gawas sa cash assistance, makahimo usab sila pagpangayo og baratohon nga lungon nga kantidad lang og P8 mil – kanang gitawag og “diwit-diwit.”

Giangkon ni Baculi nga daghang mga miaplay og cash assistance nga mangasuko ug magbagotbot tungod sa kadugay nga mahatag kanila ang maong hinabang.

Matud pa ni Baculi nga paspas ang ilang pag-asikaso sa papeles apan adto na kini malangan sa City Auditors Office ug sa treasurer kay magpaabot pa man og kwarta.