P3 Bilyon Gigahin alang sa mga Bag-ong Gamit sa PNP

(PIA 7) — Halos P3 bilyon ang gigahin sa Department of Budget Management (DBM) alang sa pagpalit og mga bag-ong high-powered firearms ug radio equipment sa Philippine National Police (PNP).

“Despite the challenges facing the PNP, the National Government fully supports the police force in fulfilling their mandate to prevent crime and maintain peace and order,” matud pa ni DBM Kalihim Butch Abad.

Matud pa nga unahon sa PNP ang pagpalit og 743 submachine guns nga mokabat sa kapin P133 milyon ang kantidad ug 34 units sa high-frequency base radio nga nagkantidad og P17 milyon.

Pagapondohan usab sa DBM ang kapin sa 200,000 basic assault rifles ug magazine nga nagkantidad og P1 bilyon.

Apil pa sa gastohan sa gobyerno ang 945 motor vehicles, 133 firearm testing equipment, 23 water bullet recovery system ug 110 cotton bullet recovery system.

Pasabot pa sa tigpamaba sa PNP nga si Generoso Cerbo, wala kini kalabotan sa Mamasapano incident tungod kay wala man nakabutang nga ihatag kini alang lamang sa Special Action Force (SAF).

Giseguro usab sa PNP nga dili mamantsahan og korapsiyon ang proseso sa pagpalit sa mga bag-ong armas. (rmn/ecb/PIA7-Bohol)