P1M Multa Batok Kolorum

● Ang kasamtangan multa nga P6,000, makonsiderar nga gamay lamang nga kantidad mao nga padayong nagpabadlong ang mga bus operators.

Ipatuman na sa Department of Transportation and Communications (DOTC) ang P1 milyon nga multa sa mga kolorum nga bus operators sugod karong Hunyo 19 aron hingusgan ang kampanya batok sa mga bus nga walay prangkisa ug mapaluag na usab ang mga nag-unang kadalanan sa nasud.

Ang maong mando ubos sa gipagawas nga Joint Administrative Order (JAO) No. 2014-01 sa DOTC, Land Transportation Franchising and Regulatory Board (LTFRB) ug Land Transportation Office (LTO) batok sa mga public utility vehicles (PUV) nga molapas sa balaod sa kadalanan.

“Safety is always our priority. Recent accidents have highlighted the need for harsher penalties to deter illegal PUV practices and to better protect the public. The most significant change we are imposing is the P1-million fine on colorum bus operators for the first offense, to show that we really mean business in putting an end to their inimical activities which put people’s lives at risk,” matud pa ni DOTC Sec. Jun Abaya.

Gipasabot ni Abaya nga mag-base ang gidak-on sa multa sa matag sakyanan kun tagpila nga bag-ong unit niini. Gibanabanang anaa sa 20 porsyento sa orihinal nga presyo sa bag-ong unit ang kantidad sa multa.

Kasamtangan P6,000 lamang ang multa sa mga bus nga gipadagang ilegal diin makonsiderar kining gamay nga kantidad mao nga padayong nagpabadlong ang mga bus operators.

Lakip nga pamultahon ang out-of-line sa usa ka pasaheroang sakyanan tungod kay giingong maisip kining kolorum kun wala kini sa iyang rota.

Niadtong Huwebes, kagahapon, gisugdan ang publication sa bag-ong pamaagi nga mahimong epektibo sa umaabot Hunyo 19, nga mao ang katapusang mga adlaw sa pagpamantala sa bag-ong polisiya.