P15.1 Bilyones na AIP, Aprobado na sa CDC

Giaprobahan na sa Cebu City Development Council (CDC) ang P15.1 Bilyones nga Annual Investment Plan (AIP) para sa lain-laing proyekto sa dakbayan sa Sugbo karong sunod tuig.

Apan si Mayor Michael Rama wala gihapon maniguro nga ang iduso niya nga Annual Budget sa 2014 mas daku pa sa P15 Bilyones.

Ang pag-aprobar sa AIP maoy kabahin sa pag-andam sa tinuig nga budget kay dili maaprobahan sa konseho ang Annual Budget 2014 kon wala pay Annual Investment Plan nga aprobado sa CDC.

Sa AIP nga giaprobahan sa City Development Council niadtong miaging Miyerkoles, ang walo ka bilyon ka pesos niini gitumong alang sa lainlaing infrastructure projects.

Ang Office of the Mayor gipagahinan og kapin sa P4 Bilyones nga kantidad alang sa pagpatuman og mga infrastrure projects samtang kapin usab sa P4 Bilyones ang gigahin sa Department of Engineering and Public Works (DEPW).

Ang City Development Council nga gipangulohan sa mayor gilangkoban sa tanang kapitan sa barangay ug mga Non-Government Organizations (NGO), ingon man ni konsehal Margot Osmena nga naglingkud isip pangulo sa Committee on Budget and Finance.

Matud ni Mayor Rama nga ang mga proyekto nga giduso sa CDC nagagikan gayud sa katawhan kay ang maong kahugpongan gilangkoban man sa mga kapitan ug sa lainlaing NGO’s.

Si City Administrator Jose Marie Poblete miingon nga ang AIP maoy ilang basihan pagpreparar sa Annual Budget kon unsa nga mga proyekto ang hatagan og prayoridad.