P133.7M Ang Gi-Aprobahan sa Konseho

Ang konseho sa dakbayan sa Sugbo mi-approve na sa Supplemental Budget No. 3 nga giduso ni Mayor Michael Rama apan P133.7 milyones lang ang kinatibuk-an nga kantidad nga giaprobahan.

Ang gipangayo nga P17 milyones alang sa gitawag og “tipping fee” nga mao kini ang pangbayad sa dakbayan sa paglabay’g mga basura sa pribado nga landfill diha sa Consolacion giibanan og P7 milyones.

Nalakip sa giaprobahan nga Supplemental Budget No. 3 ang gahin nga gitagana alang sa pagpanghatag og tag P20,000 ngadto sa mata’g opisyal ug kawani sa City Hall, nga maglakip sa mayor, vice mayor ug mga konsehal.

Sila si Konsehal Margot Osmeña ug Lea Japson dili hinoon mokobra sa ilang bahin tungod kay mauwaw sila nga ang salapi gihinganlan og “Calamity Assistance” kay wala man sila mabiktima sa bagyo ug linog.

Gusto sa mga konsehal nga ang tag P20,000 nga gitawag og Calamity Assistance ihatag sa dili pa ang pasko ug himoon kini sa tiningub nga paagi, dili kay ianam-anam aron sa pagmatuod nga wala mahutdi og kwarta ang dakbayan.

Si Konsehal Osmeña, asawa ni kanhi Mayor Tomas Osmeña, miingon nga mauwaw g’yud siya modawat sa mao nga kantidad kay salikwaot kaayo huna-hunaon nga ang City Hall nagpakilimos sa katawhan aron makapatukod og bag-o nga ospital apan migahin og dagku nga kantidad alang sa mga kawani.

Si Mayor Rama wala na makiglantugi pa mahitungod niining maong punto ni Konsehal Osmeña kay matud niya gusto siya og kahiusahan atul sa pagsaulog sa pasko.

Si City Budget Officer Nelfa Briones mipasabot nga ang pundo nga gamiton alang sa Supplemental Budget kuhaon gikan sa ilang gitawag og “savings” kay nakadaginot sila og kwarta nga para gamiton unta sa sweldo sa mga kawani.

Gipasabot ni Briones nga dunay mga pwesto sa City Hall nga wala na butangi og mga kawani human miritiro ang mga empleyado mao nga nakadaginot ang dakbayan.

Apan sa gikataho, ang laing rason mao nga dunay mga proyekto nga gigahinan unta og minilyon ka pesos nga salapi nga dili na nila ipatuman mao nga makahatag ang dakbayan og bonus nga gitawag nila og “Calamity Assistance.”

Ang paggamit sa termino nga “Calamity Assistance” gituyo aron nga dili makwestyon ang dakbayan sa Sugbo sa Department of Budget and Management (DBM).

Kon ang kantidad sa pagpanghatag og tag P20,000 sa matag kawani ibutang nga bonus, manubra na ang gasto sa dakbayan alang sa sweldo ug allowances sa mga kawani nga gilatid sa balaud.