P13 nga COLA Tun-an Pag-usab sa RTWPB-7

Tun-an pagbalik sa Regional Tripartite Wages and Productivity Board (RTWPB-7) ang gipatumang P13 nga Cost of Living Allowance (COLA) sa mga mamumuo dinhi sa Central Visayas karong sunod bulan.

Sa samang higayon tukion usab nila ang lakang bahin sa pagpausbaw sa suhol sa mga mamumuo.

Si RTWPB-7 chairman ug Department of Labor and Employment (DOLE-7) regional director Chona Montilla nagkanayon nga ilang debatihan kun ang P13 nga COLA angayan ba nga iapil sa suholan sa mga mamumuo aron magsilbing usbaw sa suweldo nga gipangayo sa mga labor sector alang niining tuiga.

Apan daan na kining gisupak sa sektor sa pamuo dinhi sa Sugbo kay alang kanila angay ipadayon ang P13 nga COLA, apan sa samang higayon hatagan sila og laing kantidad nga dugang sa ilang sulwedo.

Usa sa mga labor representative sa RTWPB-7 nga si Atty. Ernesto Carreon sa Associated Labor Union-Trade Union Congress of the Philippine (ALU-TUCP) nagkanayon nga gamay ra kaayo ang P13 nga umento sa suweldo sa mga mamumuo niining tuiga hinungdan nga ila kining babagan kun ugaling ipadayon man kini pagsugyot didto unya sa hawanan sa buhatang rehiyonal sa departamento sa pamuo.

Matud ni Carreon nga ang sektor sa pamuo dinhi sa Central Visayas moduso og laing petisyon alang sa umento sa ilang suholan nga mas dako pa kay sa P13 nga COLA sa mga mamumuo.

Midugang siya nga ilang paningkamotan nga ikahandos ang ilang pitisyon niining semana aron matun-an kini sa RTWPB7.