P10.5 Bilyones sa 2014 Dili Aprobahan sa Budget Committee

Ang committee on budget and finance sa konseho sa dakbayan sa Sugbo dili morekomendar nga aprobahan ang kinatibuk-ang P10.5 Bilyones nga budget nga gisugyot ni Mayor Michael Rama para sunod tuig.

Kini bisan og ang executive department mipahibalo na sa konseho nga ang SM Prime Holdings Incorporated gusto nga mopalit og kapin sa 26 hektareyas nga yuta sa South Road Properties (SRP).

Gipasabot ni Konsehal Margarita “Margot” Osmeña, pangulo sa committee on budget and finance, nga dili pa sigurado nga makapalit ang SM og yuta sa dakbayan.

Matud ni Osmeña nga kon mahinayon nga ang dakbayan makabaligya og yuta ngadto sa SM sa kantidad nga dul-an sa P5 Bilyones karong sunod tuig, mahimo ra nga si Mayor Rama mosugyot og Supplemental Budget.

“Kon makabaligya sila og yuta bisan og first week sa January mo-submit dayon ang mayor og Supplemental Budget. Lisud man gud kon aprobahan nato nga walay siguro nga mahalin g’yud ang yuta kay ma-deficit ta sa budget,” matud ni Osmeña.

Basi sa budget documents nga gisumiter sa Local Finance Committee didto sa konseho, ilang gipasabot nga ang P6 Bilyones sa tibuok P10.5 Bilyones nga budget kuhaon gikan sa “Capital Investment” nga naglakip sa halin sa kayutaan sa dakbayan.

Gibana-bana sa Local Finance Committee nga mokolekta ra sila og mga upat ka bilyon ka pesos sunod tuig gikan sa buhis ug ubang kolektahonon, apil na ang Internal Revenue Allotment (IRA).

Si Atty. Jose Daluz III, economic consultant ni Mayor Rama, miingon nga mahimo ra usab nga dili lang hutdon pag-approve sa konseho ang kinatibuk-ang budget nga gisugyot sa mayor.

Matud ni Osmeña nga nasuta na nila nga ang administrasyon ni Mayor Rama kanunay’ng dili makaabut sa kinatibuk-ang kantidad sa giaprobahang budget og nagpasabot nga daghang mga proyekto nga dili mapatuman.

Apan naglaum si Rama nga kon uyonan sa konseho nga makabaligya ang dakbayan og yuta sa SRP, ilang paninguhaon nga mahuman ang pag-andam sa mga dukomento aron magpirmahay na sa unang tulo ka buwan sunod tuig.

Ang mga kondisyon nga buot ipatuman sa mayor mao nga ang katunga sa kinatibuk-ang kantidad sa ibaligya nga yuta bayran sa makapalit atul sa pagpirmahay sa deed of sale, ug ang nahabilin nga kantidad mahimong bayaran sa anam-anam nga paagi.