Osmeña misaway sa ‘Loyalty Check’ ni Rama; mosang-at og kaso

Rama nagkanayon: dili magpataka og luwat og pamahayag si Osmeña

Si Kongresista Tomas Osmeña nagplano karon nga mopasaka og kaso batok ni Reelectionist Mayor Michael Rama tungod sa pagpahigayon niya og loyalty check sa mga City Hall department head.

Matud ni Osmeña nga daku kaayong salawayon ang gihimo ni Rama nga pagsukna sa mga department head sa City Hall kon andam ba sila nga mosuporta kaniya.

Sa press conference, si Osmena miingon nga peligroso kaayo kon si Rama moawhag usab ngadto sa kapolisan nga siya suportahan sa iyang tinguha nga magpapili pag-usab sa katungdanan.

Apan si Rama miingon nga dili maayong magpataka si Osmena sa pagluwat og daghang pamahayag apan hangpon niya kon mopasaka ang kongresista og kaso batok kaniya.

Matud ni Rama nga wala didto sa gipatawag niya nga miting si Osmeña mao nga wala siya masayud sa tinuoray nga isyu ug dili maayo nga magpataka siya’g luwat og mga pamahayag.

Unom sa 22 ka department heads sa City Hall nga gipatawag ni Rama og miting kaniadtong Martes sa hapon mi-walk out kon namiya kay dili sila makapasalig og politikanhong suporta sa mayor.

Apan si Rama sayo pa namahayag nga “nadala lang sa hata” ang maong mga department heads og nahibaw-an niya kinsa kanila ang walay tinguha sa pagsuporta sa iyang administrasyon.

Si City Veterinarian Alice Utlang nga usa sa unom ka department heads nga mi-walk out gikan sa miting miingon nga mitrabaho gayud sila pag-ayo apan dili nila gusto nga duhigan og pamolitika ang ilang pagserbisyo sa katawhan.

Ang unom ka department head nga namiya sa tigum nga gipatwag ni Rama naglakip sa city legal officer, city treasurer, chief sa personnel department, hepe sa dmdp, pangulo sa internal control office, ug city veterinarian.