Osmeña Mihulaghay ‘Terorismo’ ang Pagpanghulga ni Rama

Gihulagway ni Kongresista Tomas R. Osmeña nga si Mayor Michael Rama mihimo na og terorismo dihang gihulga niya nga pasakitan ang presidente sa kahugpongan sa mga konsehal sa barangay tungod lang kay wala siya tuguti nga makadiskurso atul sa kalihukan.

Wala mohatag og posible nga rason si Osmeña kon ngano nga gihimo kadto ni Rama nga masuko kon ang mga opisyal sa Barangay Councilor’s League of the Philippines (BLCP)-Cebu City Chapter mihukom nga atul sa ilang tigum walay kandidato nga pasultihon.

Si Osmeña mitataw nga giimbitar gani siya sa mga opisyal sa maong kahugpongan, kinsa gihatagan niya og P3 milyones nga hinabang-salapi sa wala pa ang eleksyon, nga motambong sa ilang kalihukan apan wala siya motambong.

Matud ni Tejero Barangay Konsehal Garry Lao nga secretary sa kahugpongan nga gitarung nila pagpasabot ang mayor nga samtang giimbitar siya nga motambong apan dili siya tugotan sa pagdiskurso.

Si Lao miingon nga gusto unta sa mayor nga ipahibalo sa dul-an sa 400 ka konsehal nga mitambong sa kalihukan nga gipirmahan na niya ang paghatag na usab og dugang honoraryom alang sa mga opisyal sa barangay.

Matud ni Lao nga nahukman ni Kasambagan Barangay Konsehal Franklin Ong, ang presidente sa kahugpongan, nga dili gayud nila tugotan ang mayor nga makadiskurso kay para patas sa ubang kandidato.

Ang mayor matud pa nasuko og misuntok sa iyang pikas kamot og misaad nga iyang suntokon si Ong kon magkita sila pag-usab. Hinoon si Rama kusganong nanghimakak sa maong pasangil.

Si Ong gikareport usab nga miluwat og pamahayag nga wala siya malisang kon mahitabo nga tinud-on sa mayor ang iyang hulga nga siya pasakitan kon sila magkatagbo.