OSCA: Seniors, Kobraha Na Ang P2,000 nga Cash Assistance

Mga senior citizen sa dakbayan sa Sugbo nga wala pa makakolekta sa ilang tag P2,000 nga cash assistance kaniadtong miaging buwan, dili na mahatagan sa mao nga kantidad kon dili nila kini makuha 15 ka adlaw gikan sa Enero 21.

Mao kini ang gipahibalo ni Rolando “Dodong” Llaguno, ang pangulo sa Office of Senior Citizens Affairs (OSCA) sa dakbayan sa Sugbo.

Matud ni Llaguno nga adunay 754 ka senior citizens gikan sa lainlaing barangay dinhi sa dakbayan ang wala makakuha sa ilang tag P2,000 atul sa pagpanghatag kaniadtong Disyembre 21.

Gitambagan ni Llaguno ang iyang kaubanan nga senior citizens nga wala pa makakuha sa tag P2,000, nga kobrahon na ang maong kantidad adto sa city treasurer’s office.

Samtang wala pa gihapo’y petsa kanus-a mahatag ang katapusang tag P2,000 ngadto sa mga senior citizens aron makompleto na paghatag ang ilang tag P10,000 nga cash assistance para sa tuig 2013.

Matud ni Mayor Michael Rama nga konsultahon pa niya si City Treasurer Diwa Cuevas kon kanus-a gayud ipahatag ang katapusang P2,000 sa matag senior citizens.