Opisyales Ipaubos sa Drug Test

Ang konseho sa syudad sa Carcar nagtinguha usab nga mapaubos sa drug test ang mga opisyal sa syudad aron mamahimong patas sa tanang mga casual ug job order employees sa syudad nga gipaubos sa surprisang drug test sa miaging semana.

Ang maong lakang gipasikad sa usa ka resulosyon sa konseho nga gipangamahanan ni konsehal Roger Montesclaros.

Sigun pa ni Montesclaros nga subay sa maayong basehanan, gikinahanglan usab ang mga dagkong mga opisyal sama sa bise mayor ug mga konsehales mopaubos usab sa drug test.

Kini aron masiguro nga ang mga opisyal sa syudad sa Carcar walay tiggamitan og ginadiling drugas.

Ang maong lakang nagpakita usab nga ang buhatan ni Carcar City Mayor Nicepuro Apura walay gidapigan sa pagpatuman sa surprise drug test.

Si Monsteclaros niingon nga siya ug ang mga kaubanan niini sa konseho andam usab nga mopaubos sa drug test pagsiguro nga walay bisan usa kanila nga katahapang mogamit og gidiling drugas.

Apan gitin-aw niini nga sama sa yanong mga kawani sa city hall sa Carcar, ang si bisan kinsang mga opisyal sa syudad nga mapamatud-an nga positibo sa pag-gamit og ginadiling drugas mag-atubang gyud og kasong administratiba.

Samtang gipahibawo ni mayor Apura nga siya ug si bise mayor Patricio Barcenas andam usab nga mapaubos sa nahisgutang drug test.

Ilakip usab sa mayor sa pagpa-eksamin ang mga department heads sa city hall apil na ang hepe sa kapolisan aron mahimo gyud kini nga maayong ehemplo sa mga kawani ug sa katawhan sa syudad sa Carcar.