OBO: Lig-on nga Glass Railings Ipatuman sa mga Mall

Ang kadagkoan sa Office of the Building Officials (OBO) mimando na sa mga tagdumala sa lainlaing malls dinhi sa dakbayan sa Sugbo nga pangilisan ang ilang mga glass railings ug lig-on nga klase sa bildo aron nga malikayan ang mga aksidente.

Si Architect Florante Catalan, assistant building official sa dakbayan sa Sugbo, mihatag sa kamandoan kay nabalaka siya nga mahitabo pag-usab nga adunay bata nga madisgrasya susama sa nahitabo sa SM City kaniadtong Abril 29.

Nahibaw-an ni Catalan nga usa ka bata nga nagpanuigon pa og 6-anyos nagdagan-dagan didto sa Upper Ground Floor ug nabanda sa glass railings. Ang bildo nabuak ug natagak ang bata paingon sa ubos nga bahin nga nahimutangan sa Food Court.

Matud ni Catalan nga gitug-anan siya ni Engr. Jim Paloma, ang mall engineer, nga gisugdan na nila sa pagpangilis ang ilang mga glass railings og lig-on nga matang sa bildo.

Ang mga inspectors sa OBO nga sila si Christopher Miranda ug Annabelle Almario Bacalso misugyot nga pangilisan ang mga ordinaryo ra nga bildo ug mga tempered glass aron malikayan ang susama nga aksidente.

Image Credit: pinoyfavs.blogspot.com