Nurse nga Mi-plaster sa Baba sa Bata Ikiha Na

●Magtiayun nakadesisyon mopasaka og kaso uban ang abag sa CHR-7 human tak-opi ang inter-agency fact finding investigation nga gipangulohan sa DOH-7 .

Karong semanaha mopasaka na ang magtiayong Noval sa ilang kaso batok sa nurse ug nagdumala sa Cebu Puericulture Center and Maternity House sa pasangil nga pagplaster sa baba sa ilang anak human kini mahimugso sa naasoy nga tambalanan.

Sigon pa sa amahan sa bata nga si Ryan Noval nga niadtong Byernis unta nila ipasaka ang kasong pag-abuso sa bata batok sa nurse ug sa naasoy nga hospital, apan nahutdan sila og oras kay kinahanglan pa kakuhaan og affidavit ang pipila ka mga testigos nga nakuha sa mga imbestigador sa Commission on Human Rights (CHR)-7 nga maoy mopalig-on sa ilang kaso.

Gitug-an sa amahan nga hayan sa adlawng Lunes o kaha sa Martes nila masang-at ang maong kaso ngadto sa Cebu City Prosecutors office kun makompleto na ang tanang mga ebedinsiya batok sa naasoy nga nurse ug tambalanan.

Dugang pa ni Noval nga nakadesisyon sila nga mopasaka og kaso ngadto sa korte uban ang abag sa CHR-7 human tak-opi ang Inter-agency fact finding investigation nga gipangulohan sa Department of Health (DOH)-7 sa miaging adlaw.