News
‘No Registration, No Travel Policy’, Ipatuman sa LTO Sugod Abril 1
(PIA 7) — Hugot nang ipatuman sa Department of Transportation and Communications (DOTC) ang ilang mga patakaran ilabi na ang ‘No Registration, No Travel Policy’ karong umaabot nga Semana Santa sa ilang proyektong gitawag nga ‘Oplan Ligtas Biyahe – Kwaresma 2015’.
Matud pa sa tigpamaba sa DOTC nga si Atty. Michael Arthur Sagcal, partikular nilang hugtan ang pagpatuman sa maong polisiya sugod Abril 1, 2015.
Nakalatid sa Memorandum Circular No. AVT-2015-1927 nga gi-isyu sa Land Transportation Office (LTO) niadtong Marso 20 ning tuig nga sugod sa Abril 1, giingong wala na`y four-wheeled motor vehicle ang mahimong gamiton o ipadagan sa mga kadalanan nga wala pa narehistro sa LTO o walay plaka.
Ang sakyanan nga masakpang walay license plate pahunongon sa mga tinugyanan ug ang nagmaneho niini kinahanglang mo-presintar sa iyang certificate of registration (CR) ug official receipt (OR) sa gamit nga sakyanan.
Multa nga nagkantidad og P5,000 ang ipahamtang sa sakyanan nga madakpang walay nakabutang nga plaka o mahimong i-impound kun ang sales invoice niini milapas na sa 37 ka adlaw samtang pahamtangan usab og multa ang driver. (mbcn/ecb/PIA7-Bohol)
