“No Plate, No Travel Policy” Gi-Oktaba

Gipahibawo sa Land Transportation Office (LTO) 7 nga gioktaba ang pagpatuman sa “No Plate, No Travel policy” nga gitakda unta sa Agosto 1, 2014.

Nagkanayon ang buhatan ni LTO-7 Regional Director Arnel Tancinco nga usa sa hinungdan niini mao ang hangyo sa mga car dealer dinhi sa Sugbo ug sa Central Visayas.

Nasayran nga dugay kaayo ang proceso sa paghikay sa mga dokumento alang sa bag-ong mga sakyanan nga nagkinahanglan og bag-ong plate number.

Gani gibana-bana nga molanat og tulo ngadto sa upat ka bulan una ma-kompleto ang proceso.

Sumala ni Tancinco nga sa pagkakaron wala pa silay matumbok nga tukmang petsa alang sa hingpit nga pagpatuman sa maong lagda.

Nasayran nga ang maong polisiya gi-undang sa pagpatuman sa miaging tuig tungod sa “Plate Standardization Program” nga maoy gihatagan og prayoridad.

Ang mga bag-ong licensed plate number sa mga sakyanan gi-release sa LTO niadtong Mayo ning tuiga.

Mikabat sa walo ka bulan nga pagkalangay human mapinalisar ang una gyud untang petsa sa pagpatuman niini niadtong Septembre 1, 2013.

Image Credit: www.gmanetwork.com